പന്തളം : കാർ ഇടിച്ച് തെറിപ്പിച്ച ബുള്ളറ്റ് ബൈക്ക് പൂർണ്ണമായും കത്തി നശിച്ച് ബൈക്ക് യാത്രികന് ഗുരുതര പരിക്ക്. എം സി റോഡിൽ കുളനട മെഡിക്കൽ ട്രെസ്റ്റ് ആശുപത്രിയ്ക്ക് സമീപം ചൊവ്വാഴ്ച വൈകീട്ട് അഞ്ചരയോടെയാണ് അപകടം നടന്നത്. ബുള്ളറ്റ് ഓടിച്ചിരുന്ന തൃക്കൊടിത്താനം കിഴക്കേമുറി പായിക്കാട്ട് ശ്രീഭദ്രയിൽ ശ്രീഹരി (24)യെ തിരുവല്ല പുഷ്പഗിരി ആശുപത്രിയിലും കാർ ഓടിച്ചിരുന്ന ഏറ്റുമാനൂർ മുല്ലൂർ വീട്ടിൽ എം. ടി അജയൻ (39) നെ പന്തളത്തെ സ്വകാര്യ ആശുപത്രിയിലും പ്രവേശിപ്പിച്ചു.
ഇന്നോവ കാർ മുൻപേ പോയ വാഹനത്തെ ഓവർടേക്ക് ചെയ്യാൻ ശ്രമിച്ചപ്പോൾ എതിരെ വന്ന ബുള്ളറ്റിൽ ഇടിക്കുകയായിരുന്നു എന്ന് നാട്ടുകാർ പറയുന്നു. കാറിന്റെ ഉള്ളിൽ നിന്ന് മദ്യക്കുപ്പിയും കണ്ടെത്തി. അടൂരിൽ നിന്നും ഫയർ ഫോഴ്സ് എത്തിയാണ് തീ നിയന്ത്രണ വിധേയമാക്കിയത്. അപകടത്തെ തുടർന്ന് എം സി റോഡിൽ മണിക്കൂറോളം ഗതാഗത കുരുക്ക് ഉണ്ടായി.
