കോന്നി : അരുവാപ്പുലം തോപ്പിൽ മിച്ചഭൂമിയിൽ നിന്നും കോട പിടികൂടി. തോപ്പിൽ മേലേതിൽ സുബാഷ് ചാരായം വാറ്റുന്നതിനായി സൂക്ഷിച്ചിരുന്ന നാൽപ്പത് ലിറ്റർ കോടയാണ് എക്സൈസ് സംഘം പിടിച്ചെടുത്തത്. എക്സൈസ് എത്തിയതറിഞ്ഞ് സുബാഷ് വീട് പൂട്ടി കടന്നുകളഞ്ഞിരുന്നു. സുബാഷിനെതിരെ കേസ് രജിസ്റ്റർ ചെയ്ത് അന്വേഷണം ആരംഭിച്ചു.
ലോക്ഡൌൺ കാലത്ത് ഇയാൾ ചാരായം വാറ്റിയിരുന്നതായും തോപ്പിൽ കോളനി കേന്ദ്രീകരിച്ച് കഞ്ചാവ് വിപണനമുള്ളതായും എക്സൈസിന് രഹസ്യ വിവരം ലഭിച്ചിരുന്നു. ഈ കോളനി നിരവധി തവണ കണ്ടെയ്മെൻ്റ് സോൺ പട്ടികയിൽ ഉൾപ്പെട്ടിരുന്നതിനാൽ പരിശോധനകൾ കുറഞ്ഞിരുന്നത് മദ്യ മയക്കുമരുന്ന് മാഫിയകൾക്ക് സഹായകമായിരുന്നു. എക്സൈസ് പ്രിവൻ്റീവ് ഓഫീസർ ബിജു ഫിലിപ്പിൻ്റെ നേതൃത്ത്വത്തിൽ സിവിൽ എക്സൈസ് ഓഫീസർമാരായ ജെ രാജേഷ്,എ ഷെഹിൻ,വി എസ് രാഹുൽ,വനിതാ സിവിൽ എക്സൈസ് ഓഫീസർ വി എച്ച് ഹസീല തുടങ്ങിയവർ പരിശോധനയിൽ പങ്കെടുത്തു.
