കോന്നി : കോന്നി മെഡിക്കല് കോളേജ് റോഡില് സ്ഥാപിച്ച സ്ട്രീറ്റ് ലൈറ്റുകള് കണ്ണടച്ചു. അഡ്വ.കെ.യു ജനീഷ് കുമാര് എം.എല്.എ യുടെ ആസ്തി വികസന ഫണ്ടില് നിന്നും അനുവദിച്ച തുകകൊണ്ടാണ് മെഡിക്കല് കോളേജിലേക്കുള്ള റോഡില് സ്ട്രീറ്റ് ലൈറ്റുകള് സ്ഥാപിച്ചത്. എന്നാല് ഈ ലൈറ്റുകളില് പകുതിയും ഇപ്പോള് രാത്രി സമയങ്ങളില് പ്രകാശിക്കുന്നില്ല. ലൈറ്റുകള് പ്രകാശിക്കാതെ വന്നിട്ട് ഏറെ ദിവസങ്ങള് കഴിഞ്ഞിട്ടും പുനസ്ഥാപിക്കാന് നടപടി സ്വീകരിച്ചിട്ടില്ല. മിക്കപ്പോഴും കാട്ടുപോത്തുകള് വിഹരിക്കുന്ന സ്ഥലമാണ് റോഡിലെ ഈ ഭാഗം. ഇതിനോടൊപ്പം രണ്ട് തവണ ഇവിടെ സ്കൂട്ടര് യാത്രക്കാര് അപകടത്തില്പ്പെട്ടിട്ടുമുണ്ട്.
കൂടാതെ രാത്രി സമയത്ത് ഇവിടെ മാലിന്യങ്ങള് റോഡില് വലിച്ചെറിയുന്ന സംഭവങ്ങളും വ്യാപകമാണ്. റോഡില് ലൈറ്റ് കത്താതെ വന്നതോടെ രാത്രിയായാല് കൂരിരുട്ടില് ആണ് പ്രദേശം. ഇതുവഴിയാണ് യാത്രക്കാര് സഞ്ചരിക്കുന്നത്. റോഡിന് ഇരുവശത്തും കാട് വളര്ന്നു നില്ക്കുന്നതിനാല് കാട്ടുപന്നി ശല്യവും വ്യാപകമാണ്. മെഡിക്കല് കോളേജിലേക്കുള്ള പ്രധാന പാതയായിരുന്നിട്ട് കൂടി മെഡിക്കല് കോളേജ് റോഡില് ലൈറ്റ് തെളിയിക്കാത്ത അധികൃതരുടെ നടപടിക്ക് എതിരെ പ്രതിഷേധം ശക്തമാണ്.
