തിരുവനന്തപുരം : ബി.ജെ.പി സംസ്ഥാന അദ്ധ്യക്ഷൻ കെ. സുരേന്ദ്രൻ നയിക്കുന്ന കേരള പദയാത്ര 27ന് തിരുവനന്തപുരത്തു സമാപിക്കും. സമാപന സമ്മേളനത്തിൽ പ്രധാനമന്ത്രി നരേന്ദ്ര മോദി പങ്കെടുക്കും. 27ന് രാവിലെ 10ന് സെൻട്രൽ സ്റ്റേഡിയത്തിൽ നടക്കുന്ന പൊതുസമ്മേളനത്തിൽ അരലക്ഷം പേർ പങ്കെടുക്കും. ലോകസഭാ തിരഞ്ഞെടുപ്പിന് മുന്നോടിയായി മൂന്നാം തവണയാണ് പ്രധാനമന്ത്രി കേരളത്തിലെത്തുന്നത്.തൃശൂരിൽ സ്ത്രീശക്തി സംഗമത്തിനും എറണാകുളത്ത് റോഡ് ഷോയ്ക്കും പ്രധാനമന്ത്രി എത്തിയിരുന്നു.
19 പാർലമെന്റ് മണ്ഡലങ്ങളിലും പര്യടനം പൂർത്തിയാക്കിയാണ് പദയാത്ര തിരുവനന്തപുരത്തെത്തുന്നത്. ജനുവരി 27ന് കാസർകോട്ടുനിന്നാണു പദയാത്ര ആരംഭിച്ചത്. പദയാത്ര വിജയിപ്പിച്ചത് സാധാരണക്കാരാണെന്ന് ബി.ജെ.പി മുൻ സംസ്ഥാന അദ്ധ്യക്ഷൻ കുമ്മനം രാജശേഖരനും ജില്ലാ അദ്ധ്യക്ഷൻ വി.വി. രാജേഷും വാർത്താസമ്മേളനത്തിൽ വ്യക്തമാക്കി .
