തണ്ണിത്തോട് : തണ്ണിത്തോട് പഞ്ചായത്തിലെ എട്ടാം വാര്ഡില് പറക്കുളത്ത് നാട്ടുകാര്ക്ക് ബുദ്ധിമുട്ടുണ്ടാകുന്ന രീതിയില് പ്രവര്ത്തിച്ചു വന്നിരുന്ന ഡോഗ് ഷെല്റ്റര് സ്ഥലത്ത് നിന്നും മാറ്റുവാന് ഉടമ പഞ്ചായത്തുമായി ധാരണയായി. ഷെല്റ്റര് മാറ്റണമെന്ന് ആവശ്യപ്പെട്ട് ജന പ്രതിനിധികളുടെ നേതൃത്വത്തില് വലിയ ജനകീയ സമരം നടന്നിരുന്നു. ഇതിനെ തുടര്ന്ന് വസ്തു ഉടമയും ഷെല്ട്ടര് ഉടമയുമായി ജനപ്രതിനിധികള് നടത്തിയ ചര്ച്ചയെ തുടര്ന്നാണ് മുപ്പത് ദിവസത്തിനുള്ളില് നായകളെ ഇവിടെ നിന്നും മാറ്റി മറ്റൊരു സ്ഥലത്ത് പുനരധിവസിപ്പിക്കാം എന്ന് ഉടമ ഉറപ്പ് നല്കിയത്.
പ്രദേശത്ത് കഴിഞ്ഞ കുറച്ചു കാലങ്ങളായി പ്രവര്ത്തിച്ചു വന്നിരുന്ന ഒരു ഫാമിലാണ് നായകളെ വളര്ത്തിയിരുന്നത്. നായകളുടെ കുരയും ദുര്ഗന്ധവും കാരണം നാട്ടുകാര്ക്ക് ബുദ്ധിമുട്ടുണ്ടായതോടെയാണ് നാട്ടുകാര് ഒന്നടങ്കം പ്രതിഷേധവുമായി രംഗത്ത് വന്നത്. ആളൊഴിഞ്ഞ ഭാഗങ്ങളില് നായകളെ വാഹനത്തില് കൊണ്ടുവന്ന് ഇറക്കി വിടുന്നതും നാട്ടുകാര്ക്ക് ബുദ്ധിമുട്ട് സൃഷ്ടിച്ചിരുന്നു.
