തിരുവനന്തപുരം : കടയ്ക്കാവൂര് റെയില്വേ സ്റ്റേഷന് പരിസരത്തും വര്ക്കല നടയറ പുല്ലാന്നിക്കോട് പ്രദേശങ്ങളില് നിന്നും ബൈക്ക് മോഷ്ടിച്ച് കടത്തിയ മോഷണ സംഘം പിടിയില്. ചെറുന്നിയൂര് അയന്തി ജാന്സി മന്ദിരത്തില് ഷിബു മകന് ഷിജോ (20), വക്കം ഇറങ്ങ് കടവ് പുളിവിളാകം ക്ഷേത്രത്തിന് സമീപം കായല് വിളുമ്പ് വീട്ടില് ഷിബു മകന് ഷിജു (20), വെട്ടൂര് സ്വദേശിയായ +2 വിദ്യാര്ഥി എന്നിവരാണ് വര്ക്കല പോലീസിന്റെ പിടിയിലായത്. കടയ്ക്കാവൂര് വര്ക്കല ഭാഗങ്ങളില് നിന്നും പള്സര് , 220 NS , യമഹ V3 ഇനങ്ങളില്പ്പെട്ട ബൈക്കുകളാണ് സംഘം മോഷ്ടിച്ചു കടത്തിയത്.
ബൈക്കുകള് മോഷ്ടിച്ച് വ്യാജ നമ്പര് പ്ലേറ്റുകള് ഘടിപ്പിച്ചും നിറം മാറ്റിയുമാണ് സംഘം ജില്ലയുടെ വിവിധ ഭാഗങ്ങളില് ഉപയോഗിച്ചിരുന്നത്. വര്ക്കലയിലെ മോഷണ സ്ഥലത്ത് നിന്ന് ലഭിച്ച സിസിടിവി ദൃശ്യങ്ങളും മറ്റുമാണ് കേസില് വഴിത്തിരിവായത്. മോഷണ സംഘത്തിലെ മറ്റു രണ്ടുപേര് ഇപ്പോഴും ഒളിവിലാണ് ഇവര്ക്കായി തിരച്ചില് തുടരുന്നു. കൂടുതല് വാഹനങ്ങള് മോഷണത്തില് ഉള്പ്പെട്ടിട്ടുണ്ടോയെന്ന് പരിശോധിക്കാന് വര്ക്കല എസ്എച്ച്ഒ സനോജ്. എസ് അന്വേഷണം ഊര്ജ്ജിതമാക്കി.
