പത്തനംതിട്ട : മകരസംക്രമ സന്ധ്യയില് ശബരീശന് ചാര്ത്താനുളള തിരുവാഭരണങ്ങള് വഹിച്ചുകൊണ്ടുളള ഘോഷയാത്ര അല്പനേരത്തിനകം സന്നിധാനത്തെത്തും. ശബരീപീഠത്തില് നിന്നും ഉടന് ശരംകുത്തിയിലെത്തുന്ന ഘോഷയാത്ര 6.15ന് സന്നിധാനത്തെത്തും. മുന്വര്ഷങ്ങളില് ലക്ഷങ്ങള് ക്യാമ്പ് ചെയ്ത് മകരവിളക്ക് ദര്ശനം നടത്തിയിരുന്നെങ്കില് ഇത്തവണ 5000പേര്ക്ക് മാത്രമാണ് ദര്ശനത്തിന് അനുമതിയുളളത്. പൊന്നമ്പല മേട്ടില് മകരവിളക്ക് ദര്ശിക്കാന് ഭക്തര് ക്യാമ്പ് ചെയ്യാറുളള പുല്ലുമേട്ടിലും ഇടുക്കി ജില്ലയിലെ മറ്റിടങ്ങളിലും ഇത്തവണ പ്രവേശനമില്ല. ശബരീശന് ദീപാരാധന നടക്കുന്ന സമയം പൊന്നമ്പല മേട്ടില് മകരവിളക്ക് ദൃശ്യമാകും.
അതേസമയം ശബരിമലയില് ഇത്തവണ കൊവിഡ് നിയന്ത്രങ്ങള് ഒരുക്കുന്നത് വെല്ലുവിളിയായിരുന്നതായി തിരുവിതാംകൂര് ദേവസ്വംബോര്ഡ് പ്രസിഡന്റ് എന്.വാസു അറിയിച്ചു. എന്നാല് സുഗമ ദര്ശനമാണ് സന്നിധാനത്ത് ഭക്തര്ക്ക് ലഭിച്ചതെന്നും ശബരിമലയില് തീര്ത്ഥാടന ദിവസങ്ങള് കൂട്ടുക എന്നത് തന്ത്രി ഉള്പ്പടെയുളളവരുമായി ചര്ച്ച ചെയ്യേണ്ട കാര്യമാണെന്നും എന്.വാസു അഭിപ്രായപ്പെട്ടു.