കൊല്ലം : ലോൺ നൽകാമെന്ന് കബളിപ്പിച്ച് പണം തട്ടിയെടുത്ത കേസില് 3 പ്രതികളെ തെന്മല പോലീസ് അറസ്റ്റ് ചെയ്തു. തെന്മല, ആര്യങ്കാവ് പഞ്ചായത്തുകളിലെ 80 ഓളം പേർക്ക് 40,000 രൂപ വീതം നൽകാമെന്ന് പറഞ്ഞാണ് പണം തട്ടിയത്. മൈനാഗപ്പള്ളി നന്ദിയാട്ടുവടക്കത്തിൽ അഖിലാസ് (29), പെരുമ്പുഴ ആളൊളിൽ പടിഞ്ഞാറ്റതിൽ വീട്ടിൽ ശ്യം (26), ശൂരനാട് കൊച്ചുവീട്ടിൽ രാഹുൽ (27) എന്നിവരെയാണ് അറസ്റ്റ് ചെയ്തത്.
വായ്പ നല്കണമെങ്കില് ആദ്യ ഗഡുവായി പണം നൽകണമെന്ന് പറഞ്ഞ് ജനങ്ങളെ വിശ്വസിപ്പിച്ചാണ് ഇവര് പണം തട്ടിയത്. പണം അടച്ചവർ നൽകിയ പരാതിയില് തെന്മല ഇൻസ്പെക്ടർ കെ. ശ്യാമിന്റെ നേതൃത്വത്തിലുള്ള സംഘം പ്രതികളെ തെന്മല – കുളത്തുപുഴ പാതയിൽ നിന്നും ഒരാളെ കുറ്റാലത്തു നിന്നും പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
