കോൽക്കത്ത : സിബിഐ അറസ്റ്റ് ചെയ്ത തൃണമൂൽ കോൺഗ്രസ് നേതാവ് ഷാജഹാൻ ഷെയ്ഖിന്റെ സഹോദരൻ ഷെയ്ഖ് ആലംഗീറിനേയും മറ്റ് രണ്ട് പേരെയും അഞ്ച് ദിവസത്തെ സിബിഐ കസ്റ്റഡിയിൽ വിട്ടു. അലംഗീർ, സിറാജുൽ മൊല്ല, മഫിജുൽ മൊല്ല എന്നിവരെ ബസിർഹത്ത് സബ് ഡിവിഷൻ കോടതിയാണ് സിബിഐ കസ്റ്റഡിയിൽ വിട്ടത്. സന്ദേശ്ഖാലി ആക്രമണവുമായി ബന്ധപ്പെട്ട് മാരത്തൺ ചോദ്യം ചെയ്യലിന് ശേഷം ശനിയാഴ്ചയാണ് അലംഗീറിനെയും മറ്റ് രണ്ട് പേരെയും സിബിഐ പിടികൂടിയത്.
ഇവർ എൻഫോഴ്സ്മെന്റ് ഡയറക്ടറേറ്റ് (ഇഡി) ഉദ്യോഗസ്ഥർക്കെതിരായ ആക്രമണത്തിന്റെ ഭാഗമായിരുന്നുവെന്നും ഷാജഹാൻ ഷെയ്ഖുമായി ബന്ധമുള്ള സ്ഥലങ്ങളിൽ ഇഡി പരിശോധന നടത്താൻ പോയപ്പോൾ അന്വേഷണ സംഘത്തെ ആക്രമിക്കാൻ ജനക്കൂട്ടത്തെ ഇവർ പ്രേരിപ്പിച്ചതായും സിബിഐ സംശയിക്കുന്നു.
