തൃശ്ശൂര് : ചിങ്ങവനം – കോട്ടയം – ഏറ്റുമാനൂര് ഇരട്ടപ്പാതയുടെ പണി പൂര്ത്തിയാകുന്നതോടെ ട്രെയിനുകളുടെ സമയം മാറും. ഇരട്ടപ്പാത വന്നതോടെ 80 തീവണ്ടികളിലായി ശരാശരി 400 മിനിറ്റ് ലാഭിക്കാനാകും. ക്രോസിങ്ങിനായുള്ള പിടിച്ചിടല് ഒഴിവാകുമ്പോള് ഇതിലും കൂടും. മൊത്തം ലാഭിക്കുന്ന സമയം വീതിക്കുമ്പോള് മിക്ക തീവണ്ടികളുടെയും സമയം മുന്നോട്ടാകും. എന്നാല് രാവിലത്തെ ജനപ്രിയ വണ്ടിയായ വേണാടിന്റെ സമയത്തില് മാറ്റമുണ്ടാകാന് സാധ്യതയില്ല.
ഒറ്റപ്പാതയില്നിന്ന് ഇരട്ടപ്പാതയിലേക്ക് കയറുമ്പോഴുണ്ടാകുന്ന താമസം ഒഴിവാകുന്നതിലൂടെയാണ് സമയം ലാഭിക്കാനാകുക. കോട്ടയം പാതയിലൂടെ ശരാശരി 80 തീവണ്ടികള് ഒരു ദിവസം ഓടുന്നുണ്ട്. ഇതുപ്രകാരമാണ് 400 മിനിറ്റ് എന്ന സമയലാഭം ഉണ്ടാകുന്നത്. ക്രോസിങ്ങിനായി പിടിച്ചിടുന്നത് ഒഴിവാകുന്നതിലൂടെ കിട്ടുന്ന സമയവും പാത മാറിക്കയറുന്നതിലൂടെ ലാഭിക്കുന്ന സമയവും ചേര്ത്തുള്ള പുതിയ തീവണ്ടി സമയമായിരിക്കും ജൂണില് നിലവില് വരുക. മെയ് 30 മുതല് ഇരട്ടപ്പാതയില് വണ്ടികളോടുമെന്നാണ് പ്രതീക്ഷ.
മിക്ക വണ്ടികളും അഞ്ചു മുതല് 10 മിനിറ്റ് വരെ നേരത്തേയാകാനാണ് സാധ്യത. ചില ദീര്ഘദൂര വണ്ടികള്ക്ക് അതില് കൂടുതല് സമയം മുന്നോട്ടാക്കാനും ഇടയുണ്ട്. രാവിലത്തെ വേണാട് നിലവില് ക്രോസിങ്ങിന് എവിടേയും പിടിച്ചിടാത്ത വണ്ടിയായതിനാല് സമയമാറ്റം ഉണ്ടാകില്ല. എന്നാല് വൈകീട്ടത്തെ വണ്ടി അഞ്ചു മിനിറ്റ് മുന്നോട്ടാക്കിയേക്കും.
