കോന്നി : പുനലൂർ – മൂവാറ്റുപുഴ സംസ്ഥാന പാത നിർമ്മാണ പ്രവർത്തനങ്ങളുമായി ബന്ധപ്പെട്ട് കോന്നി നഗരത്തിൽ ഗതാഗത നിയന്ത്രണ സംവിധാനങ്ങൾ ഇല്ലാത്തതിനെ തുടർന്ന് കോന്നിയിൽ ഗതാഗത കുരുക്ക് രൂക്ഷമായി. എലിയറക്കൽ മുതൽ കോന്നി എസ് ബി ഐ ബാങ്കിന് സമീപം വരെയുള്ള ഭാഗത്താണ് രാവിലെ പതിനൊന്ന് മണി വരെയുള്ള സമയങ്ങളിൽ ഗതാഗത കുരുക്ക് രൂക്ഷമാകുന്നത്. റോഡിൽ പലയിടത്തും കലുങ്ക് നിർമ്മാണത്തിന്റെ ഭാഗമായി റോഡ് കുഴിച്ച് ഇട്ടിരിക്കുന്നതിനാൽ വാഹനങ്ങൾ ഒരു ഭാഗത്ത് കൂടി മാത്രമേ കടത്തി വിടുന്നുള്ളു. ഇതിനാൽ വലിയ വാഹനങ്ങൾ കടന്നു പോകാതെ വരുകയും ഗതാഗത കുരുക്ക് രൂക്ഷമാവുകയും ചെയ്യുന്നത് പതിവാണ്. നഗരത്തിൽ ഗതാഗത കുരുക്ക് രൂക്ഷമാകുമ്പോഴും തിരക്ക് നിയന്ത്രിക്കാൻ പോലീസിനെയും ഹോം ഗാർഡിനേയും നിയോഗിക്കുവാനും അധികൃതർ തyyaaറായിട്ടില്ല.
ഗുരുതരാവസ്ഥയിലുള്ള രോഗികളുമായി വരുന്ന ആംബുലൻസുകൾ പോലും ഈ ഗതാഗത കുരുക്കിൽ പെട്ടുപോകുന്നത് നിത്യ സംഭവമാണ്. പുനലൂർ – മൂവാറ്റുപുഴ പാതയിൽ നിന്നും കോന്നി ചന്ദനപ്പള്ളി റോഡിലേക്ക് കടക്കുന്ന പോക്കറ്റ് റോഡും നിർമ്മാണ പ്രവർത്തനത്തിന്റെ ഭാഗമായി അടച്ചതിനാൽ ഇതും കുരുക്ക് വർധിപ്പിച്ചു. റോഡിൽ പലയിടത്തും ഗതാഗതം സ്തംഭിക്കുമ്പോൾ നാട്ടുകാർ തന്നെ ഇതിന് പരിഹാരം കാണേണ്ട സ്ഥിതിയാണിപ്പോൾ. കരാർ കമ്പനിക്കാരും ഇതിന് പരിഹാരം കാണുന്നില്ല. മണിക്കൂറുകൾ നീണ്ട കാത്തിരിപ്പിന് ഒടുവിലാണ് വാഹനങ്ങൾ നഗരത്തിൽ കൂടി കടന്നുപോകുന്നത്. കലുങ്കുകളുടെ നിർമ്മാണ പ്രവർത്തനങ്ങൾ സമയബന്ധിതമായി തീർക്കാത്തതും ഗതാഗത കുരുക്ക് രൂക്ഷമാക്കുന്നുണ്ട്.
