തിരുവനന്തപുരം: വിവാദ ഉത്തരവിറക്കിയ ചീഫ് വൈല്ഡ് ലൈഫ് വാര്ഡന് സസ്പെന്ഷന്. വിവാദ ഉത്തരവിറക്കിയ ചീഫ് വൈല്ഡ് ലൈഫ് വാര്ഡന് ബെന്നിച്ചന് തോമസിനെയാണ് സസ്പെന്ഡ് ചെയ്തത് . ബേബി ഡാം ബലപ്പെടുത്താന് പരിസരത്തെ 15 മരങ്ങള് മുറിച്ചു മാറ്റുന്നതിനു കഴിഞ്ഞ വെള്ളിയാഴ്ചയാണ് ബെന്നിച്ചന് തോമസ് ഉത്തരവിട്ടത്. ഉത്തരവിന് പിന്നില് മറ്റാര്ക്കെങ്കിലും ഉത്തരവാദിത്തമുണ്ടോ എന്ന് ചീഫ് സെക്രട്ടറി അന്വേഷിക്കും. മുഖ്യമന്ത്രി പിണറായി വിജയന് ഇടപെട്ടാണ് ഉത്തരവു മരവിപ്പിച്ചത്.
മുല്ലപ്പെരിയാറില് ബേബി ഡാം ശക്തിപ്പെടുത്തുന്നതിന് മുന്നോടിയായി മരം മുറിക്കാന് തമിഴ്നാടിന് അനുമതി നല്കിയ ഉത്തരവാണ് കേരളം റദ്ദാക്കിയത്. നിര്ണായക വിഷയം ഉദ്യോഗസ്ഥര് സര്ക്കാരുമായി ആലോചിച്ചില്ലെന്നും സംസ്ഥാന താല്പര്യം പരിഗണിക്കാത്ത ഉത്തരവെന്നും മന്ത്രിസഭ വിലയിരുത്തിയിരുന്നു. ഉത്തരവ് കേന്ദ്ര വനം, പരിസ്ഥിതി നിയമത്തിന് വിരുദ്ധമെന്നും യോഗം നിലപാടെടുത്തു. ഉത്തരവിറക്കിയതില് കേരള സര്ക്കാരിനെ അഭിനന്ദിച്ചു മുഖ്യമന്ത്രി പിണറായി വിജയനു തമിഴ്നാട് മുഖ്യമന്ത്രി എം.കെ.സ്റ്റാലിന് ശനിയാഴ്ച കത്തയച്ചപ്പോഴാണു വിവരം പുറത്തറിഞ്ഞത്
ഈ മാസം ഒന്നിനു ജലവിഭവ അഡീഷനല് ചീഫ് സെക്രട്ടറി ടി.കെ.ജോസ് ചേംബറില് വിളിച്ച യോഗത്തിലാണു മരം മുറിക്കാന് തമിഴ്നാടിന് അനുമതി നല്കിയത്. യോഗത്തിലെ നടപടിക്രമങ്ങള് ഉത്തരവായി ഈ മാസം 5നു ബെന്നിച്ചന് തോമസ് പുറത്തിറക്കി. ആഭ്യന്തര അഡീഷനല് ചീഫ് സെക്രട്ടറി കൂടിയായ ടി.കെ.ജോസിനും വനം വന്യജീവി പ്രിന്സിപ്പല് സെക്രട്ടറി രാജേഷ് കുമാര് സിന്ഹയ്ക്കും അന്നുതന്നെ ഇതേക്കുറിച്ചു ബെന്നിച്ചന് കത്തും നല്കിയിരുന്നു.
