കൊല്ലം : കരുനാഗപ്പള്ളിയില് റിട്ടയേര്ഡ് എസ്.ഐയുടെ നേതൃത്വത്തില് വീട് കയറി ആക്രമണം. ആക്രമണത്തില് വീട്ടുടമ ശ്രീകുമാര്,അമ്മ അമ്മിണിയമ്മ എന്നിവര്ക്ക് പരിക്കേറ്റു. റിട്ടയേര്ഡ് എസ്.ഐ റഷീദിന്റെ മകന്റെ അനധികൃത നിര്മാണത്തിനെതിരെ പരാതി നല്കിയതാണ് അക്രമത്തിന് കാരണമെന്ന് ശ്രീകുമാര് പറഞ്ഞു. സംഭവത്തില് രണ്ട് പേരെ പോലീസ് കസ്റ്റഡിയില് എടുത്തു.
ഇന്ന് രാവിലെ ഒന്പത് മണിയോടെയാണ് സംഭവം. കരുനാഗപ്പള്ളി കല്ലേരിഭാഗം സ്വദേശി ശ്രീകുമാറിന്റെ വീട്ടില് റിട്ടയേര്ഡ് എസ്.ഐ റഷീദിന്റെ നേതൃത്വത്തില് അഞ്ചംഗ സംഘമാണ് അക്രമണം നടത്തിയത്. ഇരുമ്ബ് പൈപ്പ് കൊണ്ടുള്ള ആക്രമണത്തില് ശ്രീകുമാറിനും, അമ്മയ്ക്കും പരിക്കേറ്റു.
ചവറ സ്വദേശിയായ റഷീദിന്റെ മകന്റെ അനധികൃത നിര്മാണത്തിനെതിരെ വിവരാവകാശ രേഖകള് ശേഖരിച്ചതും പരാതി നല്കിയതുമാണ് അക്രമത്തിന് കാരണമെന്ന് ശ്രീകുമാര് പറയുന്നു. പരിക്കേറ്റവരെ കരുനാഗപ്പള്ളി താലൂക്ക് ആശുപത്രിയില് പ്രവേശിപ്പിച്ചു. ആക്രമണത്തിന്റെ വീഡിയോ ദൃശ്യങ്ങള് ഉള്പ്പെടെയാണ് പരാതി നല്കിയിരിക്കുന്നത്. സംഭവത്തില് കരുനാഗപ്പള്ളി പോലീസ് അന്വേഷണം ആരംഭിച്ചു.
