തൃശൂര്: എറവില് ആംബുലന്സും ഓട്ടോറിക്ഷയും കൂട്ടിയിടിച്ചുണ്ടായ അപകത്തില് മരണം രണ്ടായി. അപകടത്തില് പരിക്കേറ്റ മൂന്നര വയസുകാരന് അദ്രിനാഥാണ് മരിച്ചത്. ഗുരുതര പരിക്കേറ്റ് ചികിത്സയിലായിരുന്നു കുട്ടി. തൃശൂര് വാടനപ്പിള്ളി സംസ്ഥാന പാതയില് എറവ് കപ്പല് പള്ളിയ്ക്ക് സമീപം ഇന്ന് പുലര്ച്ചെയാണ് അപകടം നടന്നത്. പടിയൂര് എടതിരിഞ്ഞി സ്വദേശിയും ഓട്ടോ ഡ്രൈവറും കുട്ടിയുടെ അച്ഛനുമായ ജിത്തു അപകടത്തെ തുടര്ന്ന് മരിച്ചിരുന്നു. ഓട്ടോയിലുണ്ടായിരുന്ന ജിത്തുവിന്റെ ഭാര്യ നീതു, നീതുവിന്റെ പിതാവ് ചിറ്റൂര് വീട്ടില് കണ്ണന് എന്നിവര് ചികിത്സയിലാണ്.
മൂന്ന് വയസുകാരനായ മകനെ ഡോക്ടറെ കാണിച്ച് മടങ്ങുമ്പോഴാണ് അപകടം ഉണ്ടായത്. തൃശൂര് – വാടാനപ്പള്ളി സംസ്ഥാന പാതയില് എറവ് കപ്പല് പള്ളിക്കു മുന് വശത്ത് പുലര്ച്ചെ ഒന്നരയോടെയായിരുന്നു അപകടം. ആംബുലന്സും ഓട്ടോ ടാക്സിയും കൂട്ടിയിടിക്കുകയായിരുന്നു. അന്തിക്കാട് പുത്തന്പീടികയിലെ പാദുവ ആസ്പത്രിയുടെ ആംബുലന്സാണ് അപകടത്തില്പ്പെട്ടത്.
