എരുമേലി: ശക്തമായ വെള്ളപൊക്കത്തിൽ തുമരംപാറ കൊപ്പം, കോയിക്കകാവ് മേഖലയിൽ വ്യാപകമായ നാശനഷ്ടം. ശനിയാഴ്ച വൈകീട്ട് നാലുമണിയോടെയുണ്ടായ മഴയിലാണ് വെള്ളം തൊട്ടിലൂടെ ശക്തമായി ഒഴുകിയത്. പറപ്പള്ളിൽ ദീപുവിന്റെ ഉടമസ്ഥതയിലുള്ള കോഴിഫാമിൽ വെള്ളം കയറി രണ്ടായിരത്തോളം കോഴികൾ ഒഴുകി പോയി. കാലിത്തീറ്റകൾ ഉൾപ്പെടെ ഒഴുകി പോയി. സമീപത്തുള്ള വീടിന്റെ ഭിത്തി തകർന്നു. നിരവധി വീടുകളിൽ വെള്ളം കയറി. അപ്രതീക്ഷിതമായുണ്ടായ മഴവെള്ളപാച്ചിലാണ് മേഖലയിൽ നാശനഷ്ടമുണ്ടാക്കിയത്. കൊപ്പം വനമേഖലയിൽ ഉരുൾപൊട്ടൽ ഉണ്ടായതായാണ് നിഗമനം. തോടുകളും മണിമലയാറും കരകവിഞ്ഞ് ഒഴുകുകയാണ്.
