കൊച്ചി :പെരുമ്പാവൂർ എംഎൽഎ എൽദോസ് കുന്നപ്പള്ളിക്കും ഭാര്യ മറിയാമ്മ എബ്രഹാമിനും ഇരട്ടവോട്ട്. അദ്ദേഹം താമസിക്കുന്ന മൂവാറ്റുപുഴ മാറാടി പഞ്ചായത്തിലാണ് ഒരു വോട്ട്. എൽദോസ് കുന്നപ്പള്ളി എംഎൽഎയായിരിക്കുന്ന പെരുമ്പാവൂരാണ് രണ്ടാമത്തെ വോട്ട്.
പെരുമ്പാവൂർ മണ്ഡലത്തിലെ ബൂത്ത് 142 ലും (ക്രമ. നമ്പര് 1354), മൂവാറ്റുപുഴ മണ്ഡലത്തിലെ ബൂത്ത് 130 (ക്രമ. നമ്പര്: 1092) മാണ് കുന്നപ്പള്ളിയുടെ വോട്ട്. ഭാര്യ മറിയാമ്മ എബ്രഹാമിന് പെരുമ്പാവൂരിലെ ബൂത്ത് നമ്പര് 142 ലും (ക്രമ. നമ്പര്: 1358), മൂവാറ്റുപുഴയിലെ ബൂത്ത് നമ്പര് 142 ലും (ക്രമ. നമ്പര്: 1095) മാണ് വോട്ടുള്ളത്. പെരുമ്പാവൂരിലെ രായമംഗലം പഞ്ചായത്തിലും മൂവാറ്റുപുഴയിലെ മാറാടി പഞ്ചായത്തിലുമാണ് ഇരുവര്ക്കും വോട്ടുള്ളത്. മൂവാറ്റുപുഴയില് വോട്ടുള്ള കാര്യം മറച്ചുവെച്ചാണ് എംഎല്എ സ്വന്തം മണ്ഡലമായ പെരുമ്പാവൂരില് വോട്ട് ചേര്ത്തതെന്ന് വ്യക്തമാണ്. രണ്ട് മണ്ഡലത്തിലും വോട്ടുള്ളപ്പോഴും ഇത് ഒഴിവാക്കാനും ശ്രമിച്ചില്ല. ഇന്നലെയാണ് എംഎല്എ പെരുമ്പാവൂർ മണ്ഡലത്തില് 2286 ഇരട്ടവോട്ടുകള് ഉണ്ടെന്ന പരാതി നല്കിയത്. സ്വന്തം കുടുംബത്തിന് രണ്ട് മണ്ഡലത്തില് വോട്ടുകള് ഉള്ളപ്പോഴാണ് അത് മറച്ചുവച്ച് എംഎല്എ തെരഞ്ഞെടുപ്പ് കമ്മീഷന് പരാതി നല്കിയതെന്നും വ്യക്തം.