ചുങ്കപ്പാറ : കോട്ടാങ്ങൽ – ചാലാപ്പള്ളി ബാസ്റ്റോ റോഡിൽ ചുങ്കപ്പാറ മുതൽ സെന്റ് ജോര്ജ്ജ് ഹൈസ്കൂൾപടി വരെ വിവിധ സ്ഥലങ്ങളിൽ റോഡിന്റെ വശങ്ങളിലെ ഓടയ്ക്ക് മൂടിയില്ലാത്തത് അപകട ഭീഷണിയാകുന്നു. കോട്ടാങ്ങൽ സർവ്വീസ് സഹകരണ ബാങ്കിനു സമീപവും ടൗണിലും ഓടക്ക് മൂടിയില്ലാത്ത നിലയിലാണ്. ഓടയും റോഡും കാണാത്തവിധം പലയിടത്തും കാടുമൂടിയിരിക്കുകയാണ്. പൊതുജനങ്ങളില് നിന്നും പരാതി ഉയർന്നിട്ട് നാളുകൾ ഏറെയായെങ്കിലും അധികൃതരുടെ ഭാഗത്തുനിന്നും ഒരു നടപടിയും സ്വീകരിച്ചിട്ടില്ല. പലയിടത്തും ഓടക്ക് പകുതി മൂടി മാത്രമാണ് ഉള്ളത്. ബാക്കിഭാഗം ഉപേക്ഷിക്കപ്പെട്ട നിലയാണ്.
രണ്ട് സ്കൂളുകളിലെ വിദ്യാർഥികൾ കാൽനടയായി പോകുന്ന സെന്റ് ജോർജ് ഹൈസ്കൂളിന് സമീപത്തെ നടപ്പാതയുടെ സ്ലാബ് തെന്നിമാറി കിടക്കുകയാണ്. റോഡിലെ തിരക്ക് ഒഴിവാക്കി വിദ്യാർഥികൾ നടന്നു പോകുന്ന പാത കൂടിയാണിത്. സ്കൂൾ തുറക്കുന്നതിന് ദിവസങ്ങൾ മാത്രമാണ് ഇനിയുള്ളത്, എന്നിട്ടും അധികൃതർ നടപടി സ്വികരിക്കുന്നില്ല. റോഡ് ഉന്നത നിലവാരത്തിൽ ഉയർത്തി ടാറിങ് നടത്തിയതല്ലാതെ അപകടങ്ങൾ ഒഴിവാക്കാനുള്ള മറ്റ് പ്രവൃത്തികൾ പൂർത്തികരിക്കാത്തത് ഇവിടെ അപകടങ്ങൾ തുടർക്കഥയാകുന്നതിന് കാരണമാകുന്നതായി നാട്ടുകാർ ചൂണ്ടിക്കാട്ടുന്നു.
