തൃശൂര് : 91ാം വയസ്സിലും അടവും ചുവടും തെറ്റാത്ത കളരി ഗുരുക്കളെ തേടിയെത്തിയത് രാജ്യത്തിന്റെ പത്മശ്രീ ആദരം. കേരളത്തിന്റെ തനതു ആയോധന കലയായ കളരിപ്പയറ്റില് നിരവധി ശിഷ്യഗണങ്ങളുള്ള ചാവക്കാടിന്റെ ഉണ്ണിഗുരുക്കള്ക്കാണ് (ശങ്കരനാരായണ മേനോന്) പത്മശ്രീ ലഭിച്ചത്. ചാവക്കാട് വല്ലഭട്ട കളരി സംഘത്തിന്റെ കളരിയാശാനും ഗുരുവുമാണ്. 2019ലെ കേരള ഫോക്ലോര് അക്കാദമി ഗുരുപൂജ അവാര്ഡും ഉണ്ണി ഗുരുക്കള്ക്കായിരുന്നു.
മലപ്പുറം തിരൂരിനടുത്ത് നിറമരുതൂരില് കളരിപ്പയറ്റ് വിദഗ്ധരുടെ കുടുംബമായ മുടവങ്ങാട്ട് തറവാട്ടിലെ ശങ്കുണ്ണി പണിക്കരുടെയും ചുണ്ടയില് കല്യാണിക്കുട്ടിയമ്മയുടെയും മൂന്നാമത്തെ പുത്രനായി 1929ലാണ് ജനനം. ഏഴാം വയസ്സ് മുതല് കളരിപ്പയറ്റ് പരിശീലനം തുടങ്ങി. മുടവങ്ങാട്ട് ഗൃഹത്തിലെ വല്ലഭട്ട കളരിയിലും സ്വഗൃഹത്തിലെ കളരിയിലുമായിരുന്നു പരിശീലനം.
14ാം വയസ്സില് മുടവങ്ങാട്ട് കളരിയില്വെച്ച് അരങ്ങേറ്റം കുറിച്ചു. ഇപ്പോഴും ചാവക്കാട് വല്ലഭട്ട കളരിയില് ഗുരുക്കളുടെ നിറ സാന്നിധ്യത്തോടെ കളരിപ്പയറ്റിന്റെ ഈരടികള് പുതു തലമുറക്ക് പകര്ന്നുനല്കുന്നു. മലപ്പുറം ഒഴൂര് കോഴിശ്ശേരി പുന്നക്കല് തറവാട്ടിലെ സൗദാമിനിയമ്മയാണ് ഭാര്യ. മക്കള്: കൃഷ്ണദാസ് (കേരള കളരിപ്പയറ്റ് അസോസിയേഷന് സംസ്ഥാന പ്രസിഡന്റ്), രാജീവ്, ദിനേശന് (കളരിപ്പയറ്റ് അസോസിയേഷന് തൃശൂര് ജില്ല സെക്രട്ടറി), നിര്മല.
