കൊല്ലം : ഉത്രവധക്കേസ് പ്രതിയായ സൂരജിനെതിരായ തെളിവുകളായ പാമ്പിനെ കൊണ്ടുവന്ന ജാര്, മയക്കാനുപയോഗിച്ച ഉറക്കഗുളികയുടെ സ്ട്രിപ്പുകള് എന്നിവ സാക്ഷികള് കോടതിയില് തിരിച്ചറിഞ്ഞു.
പാമ്പിനെ സൂക്ഷിക്കാനായി ചാത്തന്നൂരിലെ സൂപ്പര്മാര്ക്കറ്റില്നിന്നാണ് ചാവരുകാവ് സുരേഷ് ജാര് വാങ്ങിയത്. ലോക്ഡൗണ് സമയത്താണ് ജാര് വാങ്ങിയതെന്നും കോടതിയില് ഹാജരാക്കിയ ജാര് തന്റെ സൂപ്പര് മാര്ക്കറ്റില്നിന്ന് നല്കിയതാണെന്നും ഉടമ കോടതിയില് മൊഴി നല്കി.
ഉത്രയുടെ വീട്ടുപരിസരത്തുനിന്ന് ജാര് കണ്ടെടുത്തതിന് സാക്ഷിയായ നവാസും കോടതിയില് ഇക്കാര്യം മൊഴിനല്കി. ഉത്രയുടെ വീട്ടില് കിടന്നിരുന്ന സൂരജ് ഉപയോഗിക്കുന്ന കാറില്നിന്ന് രണ്ട് ഗുളികകള് മാത്രം ശേഷിക്കുന്ന ഉറക്കഗുളികയുടെ സ്ട്രിപ് കണ്ടെത്തുന്നതിന് സാക്ഷിയായ അഞ്ചല് സ്വദേശി അരുണും കോടതിയില് ഇക്കാര്യം സമ്മതിച്ചു.
അലര്ജിക്ക് ഉപയോഗിക്കുന്നതും ഉറക്കം വരുന്നതുമായ മരുന്നാണിതെന്ന് പോലീസ് തിരിച്ചറിഞ്ഞിരുന്നു. ഉത്രയുടെ ആന്തരികാവയവ പരിശോധനയില് ഈ മരുന്നിെന്റെ രാസഘടനയുടെ സാന്നിധ്യം കണ്ടെത്തുകയും ചെയ്തിട്ടുണ്ട്.
പാമ്പ് കടിയേറ്റ് മരിക്കാനിടയായ സാഹചര്യം വിലയിരുത്തിയ വിദഗ്ധസംഘത്തിലെ അംഗവും സര്പ്പശാസ്ത്ര വിദഗ്ധനുമായ കാര്കോട് സ്വദേശി മവീഷ് കുമാറിനെ കോടതി 18ന് വിസ്തരിക്കും. അണലിയെയും മൂര്ഖനെയും ഉപയോഗിച്ച് തെളിവുശേഖരണത്തിന് ഡമ്മി പരീക്ഷണവും നടത്തിയിരുന്നു.
