കൊച്ചി: വടക്കഞ്ചേരിയില് അപകടത്തില് മരിച്ച അഞ്ചു വിദ്യാര്ഥികളുടെയും മൃതദേഹങ്ങള് മുളന്തുരുത്തി ബസേലിയസ് വിദ്യാനികേതന് സ്കൂളില് വൈകീട്ട് മൂന്നുമണിയോടെ പൊതുദര്ശനത്തിന് എത്തിച്ചു. പ്രിയ വിദ്യാര്ഥികളുടെ വിയോഗത്തില് ദുഃഖം താങ്ങാനാകാതെ കലാലയം കണ്ണീരണിഞ്ഞു. പ്രതിപക്ഷ നേതാവ് വി.ഡി.സതീശന് ഉള്പ്പെടെ അന്ത്യാഞ്ജലി അര്പ്പിച്ചു. മരിച്ച അധ്യാപകന് കോവിഡ് സ്ഥിരീകരിച്ചതിനാല് മൃതദേഹം പൊതുദര്ശനത്തിന് എത്തിച്ചില്ല. കുരുന്നുകളുടെയും അവരുടെ പ്രിയപ്പെട്ട അധ്യാപകന്റെയും വേര്പാടിന്റെ പശ്ചാത്തലത്തില് മുളന്തുരുത്തിയും തിരുവാണിയൂരും ഹര്ത്താല് ആചരിക്കുകയാണ്. ഉച്ചയ്ക്കു ശേഷം ഇവിടെ കടകമ്പോളങ്ങള് അടഞ്ഞു കിടക്കുകയാണ്. മരിച്ചവര് എല്ലാവരും തന്നെ ഈ രണ്ടു പ്രദേശങ്ങളില് ഉള്ളവരാണ്.
