കൊച്ചി : വൈഗ കൊലപാതക കേസില് പ്രതിയായ പിതാവ് സനു മോഹനെതിരെ പുതിയ തെളിവ്. വൈഗക്ക് അവസാനമായി ഭക്ഷണവും കൊക്കകോളയും വാങ്ങി നല്കിയ തുറവൂരിലെ ഹോട്ടല് ജീവനക്കാര് സനു മോഹനെ തിരിച്ചറിഞ്ഞു. ഹോട്ടലില് നടന്ന തെളിവെടുപ്പിനിടെയാണ് ജീവനക്കാര് സനു മോഹനെ തിരിച്ചറിഞ്ഞത്.
വൈഗയുടെ ശരീരത്തില് മദ്യത്തിന്റെ അളവ് പോസ്റ്റുമോര്ട്ടം റിപ്പോര്ട്ടില് സ്ഥിരീകരിച്ചിരുന്നു. ആലപ്പുഴയിലെ ബന്ധുവീട്ടില്നിന്ന് കങ്ങരപ്പടിയിലെ ഫ്ലാറ്റിലേക്ക് വരുന്നതിനിടെ വൈഗക്ക് അല്ഫാമും കൊക്കകോളയും വാങ്ങി നല്കിയെന്ന് സനു മോഹന് പോലീസിനോട് പറഞ്ഞിരുന്നു. കൊക്കകോളയില് മദ്യം കലര്ത്തി നല്കിയതായാണ് പോലീസ് നിഗമനം. എന്നാല് മദ്യം നല്കിയിട്ടില്ലെന്നാണ് സനു മോഹന് പറയുന്നത്.
ഹോട്ടല് ജീവനക്കാര് സനു മോഹനെ തിരിച്ചറിഞ്ഞു. അവന് വാങ്ങിയ സാധനങ്ങള് പോലും അവര് ഓര്ത്തിരിക്കുന്നുണ്ട്. സനു മോഹന് ശീതള പാനീയവും അല്ഫാമും വാങ്ങിയകാര്യം അവര് പറഞ്ഞു. വൈഗക്ക് മദ്യം നല്കിയില്ലെന്ന് സനു മോഹന് പറയുന്നതിനാല് ഹോട്ടല് ജീവനക്കാരുടെ സ്ഥിരീകരണം ഞങ്ങളുടെ കണ്ടെത്തലുകള്ക്ക് ബലം നല്കും – അന്വേഷണ സംഘത്തിലെ ഒരു ഉദ്യോഗസ്ഥന് പറഞ്ഞു. മഹാരാഷ്ട്ര, തമിഴ്നാട്, കര്ണാടക എന്നിവിടങ്ങളിലെത്തിച്ച് തെളിവെടുത്ത സംഘം കൊല്ലൂരിലെ ഒരു ഹോട്ടലില്നിന്ന് സനു മോഹന് ഉപേക്ഷിച്ച ജാക്കറ്റ് കണ്ടെത്തിയിരുന്നു. ഹോട്ടല് ജീവനക്കാരും അത് തിരിച്ചറിഞ്ഞു.
വെള്ളിയാഴ്ച പോലീസ് തെളിവെടുപ്പ് പൂര്ത്തിയാക്കി. സനു മോഹന്റെ പ്രസ്താവനയില് ചില വൈരുദ്ധ്യങ്ങളുണ്ട്. കൂടുതല് ചോദ്യം ചെയ്യാന് രണ്ടുദിവസം മാത്രമാണ് ബാക്കി. കോടതിയില് ഹാജരാക്കുന്നതിന് മുമ്പ് സനു മോഹന് നല്കിയ എല്ലാ പ്രസ്താവനകളും വീണ്ടും പരിശോധിക്കും. കാറിലെ ഫോറന്സിക് റിപ്പോര്ട്ടിനായി കാത്തിരിക്കുകയാണ്. അവസാന റിമാന്ഡ് റിപ്പോര്ട്ട് അതിന്റെ അടിസ്ഥാനത്തിലാകും തയാറാക്കുകയെന്നും പോലീസ് പറഞ്ഞു. സാമ്പത്തിക തട്ടിപ്പ് കേസില് സനു മോഹനെ കസ്റ്റഡിയില് വാങ്ങാന് മുംബൈ പോലീസും ശ്രമിച്ചിരുന്നു.
