പത്തനംതിട്ട : ആശാസ്ത്രീയമായ റോഡ് നിർമ്മാണവും അധികാരികളുടെ അനാസ്ഥയും മൂലം അപകടം തുടർകഥ ആകുന്ന വള്ളിക്കോട് റോഡിൻറെ ശോചനീയാവസ്ഥയിൽ പ്രതിഷേധിച്ച് ജനകീയ പ്രതിരോധ സമിതിയുടെ നേതൃത്വത്തിൽ നാളെ രാവിലെ പ്രതിഷേധ കൂട്ടായ്മയും റോഡ് ഉപരോധവും സംഘടിപ്പിക്കുന്നു. അധികാരികളുടെ അനാസ്ഥയും അശ്രദ്ധയും മൂലം കഴിഞ്ഞ ദിവസം ഇവിടെവെച്ചുണ്ടായ അപകടത്തിൽ ബൈക്ക് യാത്രക്കാരന് ഗുരുതരമായി പരിക്കേറ്റിരുന്നു.
അപകടം നടന്നു രണ്ടാം ദിവസം പിന്നിടുമ്പോളും പിഡബ്ല്യൂഡിയുടെ ഭാഗത്തു നിന്നോ ബന്ധപ്പെട്ട അധികാരികളുടെ ഭാഗത്തു നിന്നോ അപകടം നടന്ന ഭാഗം സന്ദർശിക്കുവാനോ തുടർ അപകടം നടക്കാതെ ഇരിക്കുവാനുള്ള യാതൊരു നടപടികളും ഉണ്ടായിട്ടില്ല. അധികാരികളുടെ ഈ മെല്ലെ പോക്കിനെതിരെയാണ് വള്ളിക്കോട് ജനകീയ പ്രതിരോധ സമിതിയുടെ നേതൃത്വത്തിൽ പ്രതിഷേധവും റോഡ് ഉപരോധവും സംഘടിപ്പിക്കുന്നത്. അപകടം നടന്ന വള്ളിക്കോട് വായനശാലയ്ക്കും തിയേറ്റർ നും ഇടയിലുള്ള സ്ഥലത്തെ ഭാഗം വിദഗ്ധർ നൽകിയ നിർദ്ദേശ പ്രകാരം റോഡ് മണ്ണിട്ട് ഉയർത്തി ലെവൽ ആക്കി പണിയുക എന്നതാണ് നാട്ടുകാരുടെ പ്രധാന ആവിശ്യം.