പാലക്കാട്: വണ്ടാഴിയില് 14കാരി തൂങ്ങിമരിച്ച കേസില് യുവാവ് അറസ്റ്റില്. വണ്ടാഴി സി.കെ. കുന്ന് പേഴുകുറ അഫ്സലിനെയാണ് (22) പ്രത്യേക സംഘം പിടികൂടിയത്. തിങ്കളാഴ്ച രാത്രിയാണ് ചെന്നൈ ചോളിയില് ഒളിവില് കഴിഞ്ഞിരുന്ന ഇയാളെ കസ്റ്റഡിയിലെടുത്തത്. മാര്ച്ച് 28-നായിരുന്നു 14കാരി വീടിനുള്ളില് ജീവനൊടുക്കിയത്. പെണ്കുട്ടിക്ക് അഫ്സല് വിലകൂടിയ മൊബൈല് വാങ്ങിനല്കിയിരുന്നു. ഇയാള് കഴിഞ്ഞ ഒരു വര്ഷമായി പെണ്കുട്ടിയെ പീഡിപ്പിച്ചുവരികയായിരുന്നു.
പെണ്കുട്ടിക്ക് അഫ്സല് നല്കിയ മൊബൈല് വാങ്ങിയത് ലഹരി മാഫിയ വഴി കണ്ടത്തിയ പണമാണോയെന്ന് പോലീസ് പരിശോധിക്കുന്നുണ്ട്. പെണ്കുട്ടിക്ക് ഇയാള് ലഹരി നല്കിയിരുന്നുവെന്ന് കുടുംബം ആരോപിച്ചിരുന്നു. ഈ സാഹചര്യത്തിലാണ് ലഹരി മാഫിയയുടെ ബന്ധവും അന്വേഷിക്കുന്നത്. പ്രതിക്കെതിരെ പോക്സോ, ആത്മഹത്യാപ്രേരണക്കുറ്റം, തട്ടിക്കൊണ്ടുപോകല് തുടങ്ങിയ വകുപ്പുകള് ചുമത്തിയിട്ടുണ്ട്. പോസ്റ്റുമോര്ട്ടം റിപ്പോര്ട്ടില് പീഡനം സ്ഥിരീകരിച്ചതോടെ അന്വേഷണം പ്രതിയിലേക്ക് നീളുകയായിരുന്നു. പെണ്കുട്ടിയുടെ മരണത്തിന് പിന്നാലെ പ്രതി ഒളിവിലായിരുന്നു.
