തിരുവനന്തപുരം : വര്ക്കലയില് മാതൃസഹോദരന്റെ വെട്ടേറ്റ് ചികിത്സയിലായിരുന്ന യുവതി മരിച്ചു. ചാവടിമുക്ക് തൈപ്പൂയം വീട്ടില് ഷാലുവാണ് (37) മരിച്ചത്. ഷാലുവിന്റെ മാതൃസഹോദരന് ചാവടിമുക്ക് വിളയില് വീട്ടില് അനില് (47) ആണ് ആക്രമിച്ചത്. വ്യാഴാഴ്ച ഉച്ചയ്ക്കായിരുന്നു സംഭവം. ആക്രമണത്തില് ഗുരുതരമായി പരിക്കേറ്റ ഷാലു മെഡിക്കല് കോളജ് ആശുപത്രിയിലെ തീവ്രപരിചരണ വിഭാഗത്തില് ചികിത്സയിലായിരുന്നു. സ്വകാര്യ പ്രസ്സില് ജോലി ചെയ്യുന്ന ഷാലു വ്യാഴാഴ്ച വീട്ടിലെത്തി ഭക്ഷണം കഴിച്ചു മടങ്ങുമ്പോഴായിരുന്നു അനില് തടഞ്ഞുനിര്ത്തി വെട്ടിയത്.
