കോഴിക്കോട്: യൂത്ത് കോണ്ഗ്രസ് നേതാവ് ഫര്സീന് മജീദിനെ കാപ്പ ചുമത്തി ജയിലില് അടയാക്കാനുള്ള സര്ക്കാര് തീരുമാനത്തിനെതിരെ പ്രതിപക്ഷ നേതാവ് വി.ഡി.സതീശന് രംഗത്ത്. മുഖ്യമന്ത്രി പിണറായി വിജയനെതിരെ വിമാനത്തില് കരിങ്കൊടി കാട്ടിയതിന്റെ പേരില് ഫര്സീന് മജീദിനെതിരെ കാപ്പ ചുമത്താനുള്ള നീക്കത്തെ ശക്തിയായി പ്രതിരോധിക്കുമെന്ന് വി.ഡി.സതീശന് പറഞ്ഞു. ഫര്സീനെതിരെയുള്ള 19 കേസുകളില് 12 എണ്ണവും കോവിഡ് കാലത്തെ നിയന്ത്രണങ്ങള് ലംഘിച്ച് സമരം നടത്തിയതിനുള്ള നിസാര കേസുകളാണെന്നും അതില് പലതും അവസാനിച്ചുവെന്നും അദ്ദേഹം പറഞ്ഞു.
40 ക്രിമിനല് കേസുകളുള്ള എസ്.എഫ്.ഐ നേതാവിനെതിരെ കാപ്പ ചുമത്താന് സര്ക്കാര് തയ്യാറാകുമോയെന്നും സതീശന് ചോദിച്ചു. സംസ്ഥാനത്ത് വിഹരിക്കുന്ന 14,000ലധികം ഗുണ്ടകള്ക്കും കാലു വെട്ടി ബൈക്കില് കൊണ്ടു പോയവര്ക്കുമൊക്കെ എതിരെ കാപ്പ ചുമത്താന് തയാറാകാത്തവര്, കോണ്ഗ്രസുകാര്ക്കെതിരെ കാപ്പ ചുമത്താന് വന്നാല് അതേ ശക്തിയില് പ്രതിരോധിക്കും. ഈ പരിപാടി ഇവിടെ അവസാനിപ്പിക്കണം. കരിങ്കൊടി ഉയര്ത്തി പ്രതിഷേധിച്ചതിന്റെ പേരില് കാപ്പ ചുമത്തി അകത്തിടുമെങ്കില്, ഇത് സ്റ്റാലിന്റെ റഷ്യയല്ല, കേരളമാണെന്ന് മുഖ്യമന്ത്രിയെ ഓര്മ്മിപ്പിക്കുന്നു. ആ കളി ഞങ്ങളോട് വേണ്ട,’ സതീശന് വ്യക്തമാക്കി.
