തിരുവനന്തപുരം: വെഞ്ഞാറമ്മൂട്ടില് ഡിവൈഎഫ്ഐ പ്രവര്ത്തകര് കൊല്ലപ്പെട്ട സംഭവത്തില് ആരോപണവുമായി കോണ്ഗ്രസ് നേതാവ് കെ. മുരളീധരന് എംപി. കൊല്ലപ്പെട്ടരുടെ കൈയിലുണ്ടായിരുന്ന വാള് ഉത്രാടക്കൊല വെട്ടാന് കരുതിയതാണോ എന്നാണു മുരളീധരന്റെ ചോദ്യം.
വെഞ്ഞാറമൂട് ഇരട്ടക്കൊലയില് അന്വേഷണം ശരിയായ ദിശയിലല്ലെങ്കില് കോണ്ഗ്രസ് കോടതിയെ സമീപിക്കും. കേസ് കോടതിയുടെ മേല്നോട്ടത്തിലോ സിബിഐയോ അന്വേഷിക്കണം. ഗുണ്ടാ സംഘങ്ങള് തമ്മിലുള്ള പകയാണു കൊലയിലെത്തിച്ചതെന്നും മുരളീധരന് അവകാശപ്പെട്ടു. വെഞ്ഞാറമൂട്ടില് ബൈക്കില് സഞ്ചരിക്കുകയായിരുന്ന രണ്ട് ഡിവൈഎഫ്ഐ നേതാക്കളെയാണ് അക്രമികള് തടഞ്ഞു നിര്ത്തി വെട്ടിക്കൊന്നത്. വെമ്പായം തേവലക്കാട് ഒഴിവുപാറ മിഥിലാജ് (32), തേമ്പാന്മൂട് കലുങ്കിന്മുഖം സ്വദേശി ഹക്ക് മുഹമ്മദ് (28) എന്നിവരാണു കൊല്ലപ്പെട്ടത്. ഇവരുടെ ഒപ്പമുണ്ടായിരുന്ന ഷഹിന് നിസാര പരുക്കുകളോടെ രക്ഷപ്പെട്ടു.
ഡിവൈഎഫ്ഐ കലുങ്കിന്മുഖം യൂണിറ്റ് പ്രസിഡന്റാണ് ഹക്ക്. തേവലക്കാട് യൂണിറ്റ് അംഗമാണ് മിഥിലാജ്. തുടര്ച്ചയായി സിപിഎം- കോണ്ഗ്രസ് സംഘര്ഷം നടക്കുന്ന പ്രദേശമാണ് തേമ്പാന്മൂട്.
