കൊച്ചി : നടനും നിര്മാതാവുമായ വിജയ് ബാബു ബലാത്സംഗ കേസ് ഒഴിവാക്കാന് ഒരു കോടി രൂപ വാഗ്ദ്ധാനം ചെയ്തതായി പരാതിക്കാരിയായ യുവ നടി. വിജയ് ബാബു ദുബായിലായിരുന്ന സമയത്ത് അയാളുടെ സുഹൃത്തുവഴി കേസൊതുക്കാന് പണം വാഗ്ദ്ധാനം ചെയ്തെന്നാണ് നടിയുടെ വെളിപ്പെടുത്തല്. തന്നെ ശാരീരികവും മാനസികവും ലൈംഗികവുമായി ഉപദ്രവിക്കാന് ശ്രമിച്ചയാള് സുഖസുന്ദരമായി ജീവിക്കുന്നത് ആത്മാഭിമാനമുള്ള ഏത് പെണ്ണിനാണ് കണ്ടുനില്ക്കാനാകുക. വീട്ടുകാരോട് പോലും പറയാതെയാണ് പരാതി നല്കിയത്.
പരാതി നല്കണമെന്നത് തന്റെ മാത്രം തീരുമാനമായിരുന്നു. അയാളില് നിന്ന് അകലാന് ശ്രമിച്ചപ്പോള് നീ ഇനി സിനിമാ മേഖലയില് നിലനില്ക്കില്ലെന്നും അനുഭവിക്കുമെന്നും പറഞ്ഞ് ഭീഷണിപ്പെടുത്തി. പണവും സ്വാധീനവുമുള്ളതിനാല് എന്തും ചെയ്യാമെന്നുള്ള അയാളുടെ അഹങ്കാരം മാറ്റണമെന്ന് ഉണ്ടായിരുന്നുവെന്നും നടി വ്യക്തമാക്കി. പരാതി കൊടുക്കുന്നതിന് മുമ്പ് ഞാനെന്ത് ഡീലിനും റെഡിയാണെന്നും പറഞ്ഞ് അയാള് കെഞ്ചിയിട്ടുണ്ട്.
എന്റെ ആരോപണം വ്യാജമായിരുന്നെങ്കില് ആ ഡീലിന് നിന്നുകൊടുക്കുന്നതായിരുന്നില്ലേ സൗകര്യമെന്ന് നടി ചോദിക്കുന്നു. വിജയ് ബാബുവില് നിന്ന് കാശ് വാങ്ങിച്ചെന്നൊക്കെയാണ് പറയുന്നത്. ഇതിന്റ സ്ക്രീന്ഷോട്ടോ മറ്റോ ഉണ്ടെങ്കില് കാണിക്കട്ടേയെന്നും അവര് പറഞ്ഞു. വിജയ് ബാബുവില് നിന്ന് ഒരു തരത്തിലുള്ള സാമ്പത്തിക സഹായവും തനിക്ക് ലഭിച്ചിട്ടില്ലെന്ന് നടി വ്യക്തമാക്കി. അയാളുടെ സിനിമയില് അഭിനയിച്ചതിന് വെറും ഇരുപതിനായിരം രൂപയാണ് കിട്ടിയത്. ലക്ഷങ്ങള് തന്നിട്ടുണ്ടെങ്കില് തെളിവ് കാണിക്കട്ടെയെന്നും അവര് പറഞ്ഞു.
കാശ് മാത്രം ആഗ്രഹിക്കുന്ന ഒരാളായിരുന്നു ഞാനെങ്കില് എന്റെ കൈയിലുള്ള തെളിവുകളെല്ലാം വെച്ച് എനിക്ക് പണം തട്ടാമായിരുന്നു. ആത്മഹത്യ ചെയ്യുമെന്ന് പറഞ്ഞ് അയാള് എന്റെ ചേച്ചിയെ വിളിച്ചതിന്റെ റെക്കോര്ഡിംഗ് കൈയിലുണ്ട്. വിജയ് ബാബു തന്നോട് ചെയ്ത ക്രൂരതകളെക്കുറിച്ചും നടി അഭിമുഖത്തില് തുറന്നുപറഞ്ഞു. ഒച്ചയിട്ട് സംസാരിച്ചു, അടിവയറ്റില് ചവിട്ടി, ലൈംഗികതയ്ക്കായി നിര്ബന്ധിച്ചു. ഇഷ്ടമില്ലാത്ത വളരെ മോശം കാര്യങ്ങള് വരെ ചെയ്യിപ്പിച്ചു. ഫ്ലാറ്റില് നിന്ന് ഇറങ്ങിയോടിയിട്ടുണ്ടെന്നും അവര് പറയുന്നു.