കോന്നി: പത്തനംതിട്ട കോന്നിയില് ജനവാസ മേഖലയില് എത്തിയ രാജവെമ്പാലയെ വാവ സുരേഷ് വനംവകുപ്പ് നിയമങ്ങള് പാലിച്ച് പിടികൂടിയത് കഴിഞ്ഞ ദിവസമാണ്. സേഫ്റ്റി ബാഗും ഹുക്കും ഒക്കെയായിട്ടാണ് വാവ സുരേഷ് എത്തിയത്. വനംവകുപ്പ് നിയമങ്ങള് പാലിച്ച് വാവ സുരേഷിന്റെ ‘ആദ്യത്തെ പാമ്പ് പിടുത്തം’ ആയിരുന്നു ഇത്. കോന്നി മണ്ണീറയിലാണ് കഴിഞ്ഞ ദിവസം രാജവെമ്പാല എത്തിയത്.
തുടര്ന്ന് നാട്ടുകാര് വനംവകുപ്പ് സ്ട്രൈക്കിങ് ഫോഴ്സിനെയും വാവ സുരേഷിനേയും വിവരം അറിയിച്ചു. വനംവകുപ്പ് ഉദ്യോഗസ്ഥര് എത്തുന്നതിന് മുമ്പ് തന്നെ വാവ സുരേഷ് എത്തി. എന്നാല് വകുപ്പിന്റെ അനുമതിയില്ലാത്തതിനാല് വനപാലകര്ക്കായി സുരേഷ് കാത്തുനിന്നു. പിന്നാലെ വനപാലകരും എത്തി. വനംവകുപ്പിന്റെ ഉപകരണങ്ങള് ഉപയോഗിച്ച് സെക്ഷന് ഫോറസ്റ്റ് ഓഫീസര് ബിനീഷിനൊപ്പം ചേര്ന്നാണ് വാവയും പാമ്പിനെ പിടിച്ചത്.
