തിരുവനന്തപുരം : വഖഫ് ബോര്ഡ് നിയമനങ്ങള് പി.എസ്.സിക്ക് വിടുന്നതുമായി ബന്ധപ്പെട്ട് വിശദമായ ചര്ച്ച നടത്തുമെന്ന് മുഖ്യമന്ത്രി പിണറായി വിജയന് പറഞ്ഞു. സമസ്ത നേതാക്കളുമായി നടത്തിയ കൂടിക്കാഴ്ചക്ക് ശേഷമാണ് മുഖ്യമന്ത്രി ഇക്കാര്യം അറിയിച്ചത്. നിയമനം സംബന്ധിച്ച് തീരുമാനമെടുത്ത് സര്ക്കാറിനെ അറിയിച്ചത് വഖഫ് ബോര്ഡാണ്. സര്ക്കാറിന്റെ നിര്ദേശമായിരുന്നില്ല അത്. അതുകൊണ്ടു തന്നെ സര്ക്കാറിന് ഇക്കാര്യത്തില് പ്രത്യേക വാശിയൊന്നുമില്ല എന്ന് മുഖ്യമന്ത്രി വിശദീകരിച്ചു.
വിശദമായ ചര്ച്ച നടത്തും. തീരുമാനം ഉണ്ടാകുന്നതുവരെ നിലവിലെ സ്ഥിതി തുടരും. പി.എസ്.സിക്ക് നിയമനം വിടുന്നതിലൂടെ മുസ്ലിം വിഭാഗത്തില് പെടാത്തവര്ക്കും വഖഫ് ബോര്ഡില് ജോലി കിട്ടും എന്ന പ്രചാരണം സമസ്ത നേതാക്കള് മുഖ്യമന്ത്രിയുടെ ശ്രദ്ധയില്പെടുത്തി. വസ്തുതാവിരുദ്ധമായ പ്രചാരണമാണ് അതെന്ന് മുഖ്യമന്ത്രി പറഞ്ഞു. അത്തരം ഒരാശങ്കക്കും അടിസ്ഥാനമില്ലെന്നും മുഖ്യമന്ത്രി പറഞ്ഞു.
