തിരുവനന്തപുരം: സംസ്ഥാനത്തെ എല്ലാ കലാലയങ്ങളെയും സീറോ വേസ്റ്റ് ക്യാമ്പസുകളായി പ്രഖ്യാപിക്കും. പരിസ്ഥിതി ദിനമായ ജൂണ് അഞ്ചിന് ഇതുസംബന്ധിച്ച ഔദ്യോഗിക പ്രഖ്യാപനമുണ്ടാകും. അന്നുതന്നെ ആയിരം കലാലയ വിദ്യാര്ത്ഥികള് അണിചേര്ന്ന് തിരുവനന്തപുരം നഗരഹൃദയം ശുചീകരിക്കും. ജൂണ് അഞ്ചിന് രാവിലെ 9ന് തിരുവനന്തപുരം സെന്ട്രല് സ്റ്റേഡിയത്തില് ഉന്നത വിദ്യാഭ്യാസ- സാമൂഹ്യനീതി മന്ത്രി ഡോ. ആര്. ബിന്ദു ‘സീറോ വേസ്റ്റ് ക്യാമ്പസ്’ പ്രഖ്യാപനം നിര്വ്വഹിക്കും. പൊതുവിദ്യാഭ്യാസ-തൊഴില് മന്ത്രി വി.ശിവന്കുട്ടി പങ്കെടുക്കും.
എന്സിസി, എന്എസ്എസ്, കോളേജുകളിലെ മറ്റു ക്ലബ്ബുകള് എന്നിവയെ ഏകോപിപ്പിച്ചാണ് ‘സീറോ വേസ്റ്റ് ക്യാമ്പസ്’ സമ്പൂര്ണ്ണ ശുചിത്വ പ്രവര്ത്തനങ്ങള്. സെക്രട്ടേറിയറ്റിന്റെ സൗത്ത് ഗേറ്റ് മുതല് വെള്ളയമ്പലം അയ്യങ്കാളി സ്ക്വയര് വരെയുള്ള ഭാഗത്തെ ശുചീകരണപ്രവര്ത്തനമാണ് ‘സീറോ വേസ്റ്റ് ക്യാമ്പസ്’ പ്രചാരണഭാഗമായി തിരുവനന്തപുരത്ത് കലാലയ വിദ്യാര്ത്ഥികളുടെ നേതൃത്വത്തില് ഏറ്റെടുക്കുക.
