കോന്നി : കോന്നി നഗരത്തിൽ ഓടയിൽ ഉപേക്ഷിക്കുന്ന മാലിന്യങ്ങൾ ജനങ്ങൾക്ക് ബുദ്ധിമുട്ട് സൃഷ്ടിക്കുന്നു. കോന്നി പോസ്റ്റ് ഓഫീസ് റോഡിലാണ് കൂടുതലും ഓടയിൽ മാലിന്യങ്ങൾ ഉപേക്ഷിക്കുന്നത്. ചാക്കിലും പ്ലാസ്റ്റിക് കവറിലും കെട്ടി ഓടയുടെ എയർ ഹോൾ വഴി അകത്തേക്ക് ഇടുകയാണ് ചെയ്യുന്നത്. ഓടയിൽ വെള്ളമില്ലാത്തതിനാൽ ഇവിടെ നിന്നും ഉയരുന്ന ദുർഗന്ധം ജനങ്ങൾക്ക് വലിയ ബുദ്ധിമുട്ടാണ് സൃഷ്ടിക്കുന്നത്.
രാത്രിയിലാകാം ഇത്തരത്തിൽ മാലിന്യം ഉപേക്ഷിക്കുന്നത് എന്നാണ് നാട്ടുകാർ പറയുന്നത്. പോസ്റ്റ് ഓഫീസ് റോഡിലെ ഓട്ടോറിക്ഷ തൊഴിലാളികൾക്കും ഇത് വലിയ പ്രതിസന്ധിയാണ് സൃഷ്ടിക്കുന്നത്. രാവിലെ മുതൽ വൈകുന്നേരം വരെ ഓട്ടോറിക്ഷ തൊഴിലാളികൾ ദുർഗന്ധം സഹിച്ചാണ് സ്റ്റാൻഡിൽ നിൽക്കുന്നത്. കോന്നി ഗ്രാമ പഞ്ചായത്തും സംഭവത്തിൽ നടപടി സ്വീകരിക്കുന്നില്ലെന്ന് ആക്ഷേപമുണ്ട്.
