പത്തനംതിട്ട: പത്തനംതിട്ട നഗരത്തിന്റെ ഹൃദയഭാഗത്ത് വിവിധ സ്ഥലങ്ങളില് ഉപേക്ഷിക്കപ്പെടുന്ന മാലിന്യങ്ങള് കുന്നുകൂടി ചീഞ്ഞുനാറുമ്പോള് മാലിന്യ സംസ്കരണ സംവിധാനങ്ങള് ഊര്ജ്ജിതമാക്കുവാന് നഗരസഭയ്ക്ക് കഴിയുന്നില്ല. നഗരത്തില് മാലിന്യങ്ങള് കുന്നുകൂടുന്നത് പൊതുജനങ്ങള്ക്ക് വെല്ലുവിളി ഉയര്ത്തുന്നതിന് ഒപ്പം തന്നെ രോഗഭീതിയും വര്ധിപ്പിക്കുന്നു. തുമ്പൂര്മൂഴി മാതൃകയില് സ്വകാര്യ ബസ് സ്റ്റാന്റിലുള്ള മാലിന്യ സംസ്കരണ സംവിധാനമാണ് ആകെയുള്ളത്. എന്നാല് ഇതില് പരിഹരിക്കാവുന്നതിലും അപ്പുറമാണ് നഗര ഹൃദയത്തിലെ മാലിന്യ പ്രശ്നങ്ങള്.
പത്തനംതിട്ട നഗരത്തിലൂടെ ഒഴുകുന്ന കണ്ണങ്കര തോട്, ജില്ല ആശുപത്രിയുടെ പുറകില് ഡോക്ടര്സ് ലൈന് ഭാഗത്ത് കൂടിയുള്ള തോട്, ചന്തയുടെ ഭാഗം, സ്വകാര്യ വ്യക്തികളുടെ ഭൂമികള് എന്നിവിടങ്ങളില് എല്ലാം മാലിന്യങ്ങള് കുമിഞ്ഞുകൂടി കിടക്കുകയാണ്. ശുചിമുറി മാലിന്യ സംസ്കരണവും പത്തനംതിട്ട നഗരസഭ നേരിടുന്ന പ്രധാന വെല്ലുവിളിയാണ്. മാസങ്ങള്ക്ക് മുന്പ് ഡോക്ടെഴ്സ് ലൈന് ഭാഗത്ത് കുഴി കുത്തി മൂടിയ മാലിന്യങ്ങള് നഗരസഭ നീക്കം ചെയ്തിരുന്നു. ബയോ മെഡിക്കല് മാലിന്യങ്ങള് അടക്കം പൊതു നിരത്തുകളില് വലിച്ചെറിയപ്പെടുന്നുണ്ട്. പലയിടത്തും റോഡിലൂടെ മൂക്കുപൊത്തി നടക്കേണ്ട അവസ്ഥയാണ്. മാലിന്യങ്ങള് എലികളുടെയും കൊതുകുകളുടെയും പ്രജനന കേന്ദ്രം കൂടിയായി മാറിയിട്ടുണ്ട്. ഓടകളില് കെട്ടികിടക്കുന്ന മലിന ജലവും ജനങ്ങള്ക്ക് ബുദ്ധിമുട്ടാകുന്നു. കൂടുതല് ശക്തമായ മാലിന്യ നിര്മ്മാര്ജ്ജന രീതികള് ആവിഷ്കരിച്ചു നടപ്പിലാക്കുവാന് നഗരസഭ തയ്യാറായില്ലെങ്കില് ഗുരുതരമായ പകര്ച്ച വ്യാധികളാകും നഗരവാസികളെ കാത്തിരിക്കുന്നത്.
