റാന്നി: സംസ്ഥാന പാതയിലെ വെള്ളക്കെട്ട് വാഹനയാത്രികര്ക്കും കാല്നട യാത്രക്കാര്ക്കും ദുരിതമായി മാറുന്നു. പുനലൂര്-മൂവാറ്റുപുഴ സംസ്ഥാന പാതയിലെ വലിയകലുങ്ക് നീര്പ്പാലത്തിന് സമീപമാണ് വെള്ളക്കെട്ട് രൂപപെട്ടിരിക്കുന്നത്. റോഡിന് വശത്ത് ഓട നിര്മ്മിച്ചിട്ടുണ്ടെങ്കിലും ചെളിയും ഇലകളും വീണ് അടഞ്ഞ നിലയിലാണ്. നീര്പ്പാലത്തിലെ ചോര്ച്ചയും സമീപത്തെ പാറക്കെട്ടില് നിന്നുമുള്ള ഉറവ രൂപപെട്ടിട്ടുള്ള വെള്ളവുമാണ് പാതയില് നിറയുന്നത്.
ഉന്നത നിലവാരത്തില് നിര്മ്മിച്ച റോഡിലൂടെ വാഹനങ്ങള് വേഗതയിലാണ് എത്തുന്നത്. വാഹനങ്ങള് വെള്ളക്കെട്ടില് ഇറങ്ങുന്നതോടെ ചെളിവെള്ളം തെറിക്കുകയാണ്. അത് കാല്നട യാത്രക്കാരുടെ ശരീരത്തേക്ക് തെളിച്ചു വീഴുകയാണ്. റോഡിന്റെ പരിപാലനം മിക്കയിടങ്ങളിലും നടക്കുന്നുണ്ടെങ്കിലും ഈ ഭാഗം അവഗണിക്കുകയാണ് പതിവ്. ഓടയിലെ ചെളി നീക്കിയാല് വെള്ളക്കെട്ട് ഒഴിവാക്കാന് ആവും. ഇതിന് കെ.എസ്.ടി.പി അധികൃതര് തയ്യാറാകണമെന്ന ആവശ്യം ശക്തമാണ്.
