തിരുവനന്തപുരം : കേരളത്തില് പെയ്യുന്നത് പ്രതീക്ഷിക്കുന്നതിലും കനത്ത മഴ.അതുകൊണ്ട് തന്നെ അണക്കെട്ടുക്കള് ഈ മാസവും നിറയാനുള്ള സാധ്യത ഏറെയാണ്. മഴയ്ക്കൊപ്പം കാറ്റും പ്രതിസന്ധി കൂട്ടുന്നു. അടുത്ത മണിക്കൂറുകളില് കേരളത്തിലെ എല്ലാ ജില്ലകളിലും ഒറ്റപ്പെട്ടയിടങ്ങളില് ഇടിയോടുകൂടിയ മഴയ്ക്കും മണിക്കൂറില് 40 കിലോമീറ്റര് വരെ വേഗത്തില് വീശിയടിച്ചേക്കാവുന്ന കാറ്റിനും സാധ്യതയുണ്ടെന്നു കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. 5 ദിവസം മഴ തുടര്ന്നേക്കും. ഇത് പ്രളയസമാനമായ സാഹചര്യം ഉണ്ടാക്കാന് സാധ്യത ഏറെയാണ്.
പത്തനംതിട്ട, കോട്ടയം, ഇടുക്കി ജില്ലകളില് ഞായറാഴ്ച യെലോ അലര്ട്ടും പ്രഖ്യാപിച്ചു. മഴയ്ക്കൊപ്പം കാറ്റിനും ഇടിമിന്നലിനും സാധ്യതയുള്ളതിനാല് ജാഗ്രത പുലര്ത്തണം. കാറ്റില് മരങ്ങള് വീഴുന്നത് വലിയ നാശനഷ്ടത്തിന് കാരണമാകുന്നുണ്ട്. വൈദ്യുതി ലൈനുകള്ക്കും വ്യാപക നഷ്ടമുണ്ടാക്കുന്നുണ്ട്. ഇതെല്ലാം ദുരിതം കൂട്ടും. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നതുകൊണ്ട് അര്ത്ഥമാക്കുന്നത്. ശനിയാഴ്ച ഇടുക്കി ജില്ലയില് മഞ്ഞ അലേര്ട്ട് ആണ് പ്രഖ്യാപിച്ചിട്ടുള്ളതെങ്കിലും ശക്തമായതോ അതിശക്തമായതോ മഴയ്ക്ക് സാധ്യത ഉണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു. സാധാരണ ഏപ്രില് മാസം ചൂടിന്റേതാണ്. ഇതാണ് മഴയ്ക്കും ഇടിമിന്നലിനും വഴിമാറുന്നത്.
കേരള തീരത്ത് ശനിയാഴ്ച മത്സ്യബന്ധനത്തില് ഏര്പ്പെടുവാന് പാടുള്ളതല്ല എന്ന് കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്. കേരള തീരത്ത് മണിക്കൂറില് 40-50 കിലോമീറ്റര് വേഗത്തില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്. കേരള തീരത്ത്നിന്നും ആരും ഈ മുന്നറിയിപ്പ് പിന്വലിക്കുന്നത് വരെ കടലില് പോകരുതെന്നും കാലാവസ്ഥ വകുപ്പ് അറിയിച്ചു. അതേസമയം കര്ണാടക – ലക്ഷദ്വീപ് തീരങ്ങളില് മത്സ്യബന്ധനത്തിന് നിലവില് തടസ്സമില്ല.
വീട്ടുവളപ്പിലെ മരങ്ങളുടെ ചില്ലകള് വെട്ടിയൊതുക്കണം. അപകടകരമായി നില്ക്കുന്ന മരങ്ങള് പൊതു ഇടങ്ങളില് ശ്രദ്ധയില്പെട്ടാല് തദ്ദേശ സ്ഥാപനങ്ങളെ അറിയിക്കണം. ഓല മേഞ്ഞതോ ഷീറ്റിട്ടതോ അടച്ചുറപ്പില്ലാത്തതോ ആയ വീടുകളില് താമസിക്കുന്നവര് അധികൃതരുമായി, 1077 എന്ന നമ്പറില് മുന്കൂട്ടി ബന്ധപ്പെടുകയും മുന്നറിയിപ്പ് വരുന്ന ഘട്ടങ്ങളില് സുരക്ഷിത കെട്ടിടങ്ങളിലേക്ക് മാറിത്താമസിക്കേണ്ടതുമാണ്. കാറ്റും മഴയും ശക്തമാകുമ്പോള് വൈദ്യുതി കമ്പികളും പോസ്റ്റുകളും പൊട്ടിവീഴാനുള്ള സാധ്യത കൂടുതലാണ്. ഇത്തരത്തില് അപകടം ശ്രദ്ധയില് പെട്ടാല് ഉടനെ കെഎസ്ഇബിയുടെ 1912 എന്ന കണ്ട്രോള് റൂമിലോ 1077 എന്ന നമ്പറില് ജില്ലാ ദുരന്ത നിവാരണ അഥോറിറ്റിയുടെ കണ്ട്രോള് റൂമിലോ വിവരം അറിയിക്കണം.
