കോഴിക്കോട്: ജില്ലയില് നാളെ മുതല് ശനിയാഴ്ച വരെ താപനില ഉയരാന് സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം. നിലവിലെ താപനിലയെക്കാള് മൂന്ന് മുതില് നാല് ഡിഗ്രി സെല്ഷ്യസ് വര്ധിക്കും. ആലപ്പുഴ, കോട്ടയം , തൃശ്ശൂര് ജില്ലകളില് 2 മുതല് 3 ഡിഗ്രി സെല്ഷ്യസ് വരെ ഉയരാന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
പൊതുവെ സംസ്ഥാനത്ത് ചൂട് വര്ധിക്കുന്നതിന്റെ പശ്ചാത്തലത്തില് ജനങ്ങള് മുന്കരുതല് സ്വീകരിക്കണമെന്ന് ദുരന്തനിവാരണ അതോറിറ്റി അറിയിച്ചു. സൂര്യതാപം, സൂര്യാഘാതം തുടങ്ങിയ ഗുരുതരമായ ആരോഗ്യ പ്രശ്നങ്ങളെ പ്രതിരോധിക്കാന് വേണ്ടി താഴെ പറയുന്ന നിര്ദേശങ്ങള് പാലിക്കേണ്ടതാണ്. ലോക്ക് ഡൗണിന്റെ ഭാഗമായി വീട്ടിലിരിക്കുന്നവര് പകല് 11 മണി മുതല് 3 വരെയുള്ള സമയത്ത് നേരിട്ട് ശരീരത്തില് വെയിലേല്ക്കുന്നത് ഒഴിവാക്കുക. അത്യാവശ്യ ഘട്ടങ്ങളില് പുറത്തിറങ്ങുന്നവര് തൊപ്പിയോ കുടയോ ഉപയോഗിക്കേണ്ടതാണ്.
വീട്ടില് ഇരിക്കുന്നവരും ധാരാളമായി ശുദ്ധജലം കുടിക്കുക. വീട്ടിലും മുറികളിലും വായുസഞ്ചാരം ഉറപ്പാക്കുക. നിര്ജ്ജലീകരണം വര്ധിപ്പിക്കാന് ശേഷിയുള്ള മദ്യം, ചായ, കാപ്പി പോലെയുള്ള പാനീയങ്ങള് പകല് സമയത്ത് ഒഴിവാക്കുക. അയഞ്ഞ, ലൈറ്റ് കളര്, കട്ടി കുറഞ്ഞ പരുത്തി വസ്ത്രങ്ങള് ധരിക്കുക.
പ്രായമായവര്, ഗര്ഭിണികള്, കുട്ടികള്, മറ്റ് രോഗങ്ങള് മൂലമുള്ള അവശത അനുഭവിക്കുന്നവര് തുടങ്ങിയ വിഭാഗങ്ങള് പകല് 11 മണി മുതല് 3 മണി വരെ നേരിട്ട് സൂര്യപ്രകാശം ഏല്ക്കാതെയിരിക്കാന് പ്രത്യേകം ശ്രദ്ധിക്കണം. ഇത്തരം വിഭാഗങ്ങള്ക്ക് എളുപ്പത്തില് സൂര്യാഘാതം ഏല്ക്കാനുള്ള സാധ്യതയുള്ളതിനാല് ഇവരുടെ കാര്യത്തില് പ്രത്യേക ശ്രദ്ധ പുലര്ത്തേണ്ടതാണ്.
പുറം തൊഴിലുകളില് ഏര്പ്പെടുന്ന ഉദ്യോഗസ്ഥര്ക്ക് കുടിവെള്ളം ലഭ്യമാക്കുന്ന രീതിയിയിലുള്ള മാതൃകപരമായ ജനകീയ പ്രവര്ത്തനങ്ങള് യുവജന, സാംസ്കാരിക, സാമൂഹിക സംഘടനകള്ക്കും കൂട്ടായ്മകള്ക്കും ഏറ്റെടുക്കാവുന്നതാണ്. നല്ല പോഷക സമൃദ്ധമായ ഭക്ഷണം കഴിക്കാനും ധാരാളമായി പഴങ്ങള് കഴിക്കാനും നിര്ദേശിക്കുന്നു. നിര്ജ്ജലീകരണം തടയാന് ORS ലായനി പ്രോത്സാഹിപ്പിക്കപ്പെടേണ്ടതാണ്. വളര്ത്തു മൃഗങ്ങള്ക്ക് തണല് ഉറപ്പു വരുത്താനും പക്ഷികള്ക്കും മൃഗങ്ങള്ക്കും വെള്ളം ലഭ്യമാക്കാനും ശ്രദ്ധിക്കേണ്ടതാണ്.
