കോഴിക്കോട് : മേപ്പയ്യൂരിൽ വിവാഹ ആഘോഷത്തിന്റെ ഭാഗമായി റോഡിൽ അപകടകരമായ രീതിയിൽ അഭ്യാസപ്രകടനം നടത്തിയ സംഘത്തിനെതിരെ നടപടിയെടുത്ത് മോട്ടോർ വാഹന വകുപ്പ്. അഭ്യാസ പ്രകടനം നടത്തിയ യുവാക്കളുടെ വാഹനങ്ങൾ കസ്റ്റഡിയിലെടുക്കുകയും ഡ്രൈവർമാരുടെ ലൈസൻസ് ആറുമാസത്തേക്ക് സസ്പെൻഡ് ചെയ്യുകയും ചെയ്തു. കഴിഞ്ഞ ദിവസമാണ് വിവാഹസംഘം വാഹനങ്ങളുമായി നിരത്തിലിറങ്ങിയത്. മേപ്പയ്യൂരിലെ മഞ്ഞക്കുളം എന്ന സ്ഥലത്ത് കാറുകൾ നിരനിരയായി ഓടിച്ചും വാഹനങ്ങളുടെ ഡോറുകളിൽ കയറിയിരുന്നും യുവാക്കൾ അഭ്യാസപ്രകടനം നടത്തി. അഭ്യാസ പ്രകടനം പ്രദേശത്ത് വലിയ രീതിയിലുള്ള ഗതാഗത തടസമാണ് ഉണ്ടാക്കിയത്. നാട്ടുകാർ ഈ ദൃശ്യങ്ങൾ പകർത്തി പോലീസിനെയും മോട്ടോർ വാഹന വകുപ്പിനെയും വിവരം അറിയിക്കുകയായിരുന്നു.
അപകടകരമായ ഡ്രൈവിംഗിനും ടാക്സി പെർമിറ്റുള്ള വാഹനങ്ങൾ നിയമവിരുദ്ധമായി ഇത്തരം ആവശ്യങ്ങൾക്ക് ഉപയോഗിച്ചതിനും കേസെടുത്തിട്ടുണ്ട്. വാഹനങ്ങളുടെ ആർ.സി താൽക്കാലികമായി റദ്ദാക്കി.നിയമലംഘകർക്ക് പിഴയും ചുമത്തിയിട്ടുണ്ട്. റോഡിലെ അഭ്യാസപ്രകടനങ്ങൾക്കെതിരെ വരും ദിവസങ്ങളിലും പരിശോധന ശക്തമാക്കുമെന്ന് അധികൃതർ അറിയിച്ചു.
