പത്തനംതിട്ട : വേനല് കടുത്തതോടെ പത്തനംതിട്ട ജില്ലയിലെ മലയോര മേഖലയിലെ കിണറുകള് വറ്റിവരളുന്നു. കിണറുകള് മാത്രമുള്ള മേഖലകളില് കുടിവെള്ളം ലഭിക്കാതെ വന്നതോടെ ദുരിതത്തിലായിരിക്കുകയാണ് ജനങ്ങള്. ജില്ലയിലെ ചിറ്റാര്, സീതത്തോട്, റാന്നി, കോന്നി, കലഞ്ഞൂര് അടക്കമുള്ള മലയോര മേഖലയിലാണ് കുടിവെള്ളം കിട്ടാകനിയായി മാറുന്നത്. കല്ലാറും അച്ചന്കോവിലാറുമാണ് പത്തനംതിട്ട ജില്ലയുടെ ദാഹമകറ്റുന്നത്. നിരവധി കുടിവെള്ള പദ്ധതികളും ഈ നദികളെ ആശ്രയിച്ച് മുന്നോട്ട് പോകുന്നു. എന്നാല് വേനല് കടുത്തതോടെ ഇവയെല്ലാം വറ്റിവരളാന് തുടങ്ങിയത് രൂക്ഷമായ കുടിവെള്ള ക്ഷാമത്തിലേക്കാണ് ജനങ്ങളെ കൊണ്ടുവന്നെത്തിക്കുന്നത്.
ജലക്ഷാമം രൂക്ഷമായ പ്രദേശങ്ങളില് മുന്വര്ഷങ്ങളില് തദ്ദേശ സ്വയംഭരണ സ്ഥാപനങ്ങള് ടാങ്കുകളില് കുടിവെള്ളം എത്തിച്ചിരുന്നു. എന്നാല് ഇത്തവണ പലയിടത്തും ഈ സംവിധാനമില്ല. പലരും വീടുകളിലേക്ക് ആവശ്യമായ വെള്ളം വലിയ വിലകൊടുത്താണ് വാങ്ങുന്നത്. മലയോര പ്രദേശങ്ങളിലെ ഉയര്ന്ന സ്ഥലങ്ങളില് ചെറിയ നീരുറവകള് ജനങ്ങള്ക്ക് വലിയ ആശ്വാസമായിരുന്നു. എന്നാല് കടുത്ത വേനലില് ഇവയെല്ലാം പൂര്ണ്ണമായി വറ്റിത്തുടങ്ങിയതോടെ ഈ പ്രതീക്ഷയും അസ്തമിച്ചു.
കാര്ഷിക മേഖലയാണ് ഏറ്റവും കൂടുതല് വെല്ലുവിളികള് നേരിടുന്നത്. വാഴയും മറ്റ് കാര്ഷിക വിളകള്ക്കും വെള്ളം കിട്ടാതെ വന്നതോടെ പലയിടത്തും കൃഷി കരിഞ്ഞുണങ്ങി തുടങ്ങി. കന്നുകാലികളെ വളര്ത്തുന്നവര്ക്കും വെള്ളമില്ല. ജില്ലയിലെ നദികള് കൂടി വറ്റിതുടങ്ങിയത് ജല വിതരണം നിശ്ചലമാക്കാനും സാധ്യതയുണ്ട്. തിരഞ്ഞെടുപ്പ് രംഗം ജില്ലയില് ചൂടുപിടിക്കുമ്പോള് ജില്ലയുടെ ദാഹമകറ്റുവാന് കൂടി ബന്ധപ്പെട്ട അധികൃതരുടെ അടിയന്തിര ഇടപെടല് ആവശ്യമാണ്.
