കോഴിക്കോട് : മല്സ്യവില്പന നടത്തുന്നതിനിടെ വീട്ടമ്മയെ മര്ദിച്ച ഭര്ത്താവ് കസ്റ്റഡിയില്. കാട്ടുവയല് കോളനി സ്വദേശി നിധീഷിനെ പിടികൂടിയത് വയനാട്ടില് നിന്നാണ്. തമിഴ്നാട്ടിലേക്ക് കടക്കാനുള്ള ശ്രമത്തിനിടെയാണ് പോലീസ് പിടിയിലായത്. മദ്യപിക്കാന് പണം നല്കാത്തത്തിന്റെ പേരിലായിരുന്നു ആക്രമണം. പരുക്കേറ്റ യുവതി ബീച്ച് ആശുപത്രിയില് ചികിത്സ തേടി. അശോകപുരത്ത് മീന് കച്ചവടം നടത്തുകയായിരുന്ന കക്കോടി സ്വദേശി ശ്യാമിലിക്കാണ് ക്രൂര മര്ദനം ഏറ്റത്.
ഇന്നലെ രാവിലെ മദ്യപിക്കാന് പണം ചോദിച്ചെങ്കിലും കൊടുത്തില്ല. ഇതിന്റെ ദേഷ്യത്തിലാണ് വൈകീട്ട് മദ്യപിച്ച് എത്തി മീന് തട്ട് മറിച്ചിട്ട് ശ്യാമിലിയെ മുഖത്തും കഴുത്തിലും ചവിട്ടിയത്. സഹപ്രവര്ത്തകര് തടയാന് ശ്രമിച്ചെങ്കിലും അതൊന്നും വക വയ്ക്കാതെ ആയിരുന്നു പരാക്രമം. യുവതിയുടെ ഭര്ത്താവായ നടക്കാവ് കാട്ടുവയല് കോളനി സ്വദേശി നിധീഷിനിതിരെ പോലീസ് കേസെടുത്തു.
എന്നാല് യഥാസമയം കേസെടുക്കാന് തയ്യാറാകാത്തത് കൊണ്ടാണ് അതിക്രമം ഇത്രയും കാലം സഹിക്കേണ്ടി വന്നതെന്നും പോലീസ് നടപടി എടുത്തില്ലെന്നും വീട്ടമ്മ കുറ്റപ്പെടുത്തി. ശ്യാമിലിയുടെ ഇരുചക്ര വാഹനവും നിതീഷ് തകര്ത്തിരുന്നു. എന്നാല് വീഴ്ച്ച സംഭവിച്ചിട്ടില്ലെന്നാണ് പോലീസ് വാദം.
