പത്തനാപുരം : വന്യമൃഗശല്യത്തില് നിന്ന് വളര്ത്തുമൃഗങ്ങളെയും പക്ഷികളെയും സംരക്ഷിക്കാന് കൂടുകള് മരച്ചില്ലകളില് കെട്ടിത്തൂക്കി കാവലിരിക്കുകയാണ് ഗ്രാമവാസികള്. കടശേരി, പുന്നല, പാടം, വെള്ളംതെറ്റി, അച്ചന്കോവില് തുടങ്ങി വനാതിര്ത്തിയില് താമസിക്കുന്ന കുടുംബങ്ങളാണ് വന്യമൃഗശല്യം പ്രതിരോധിക്കാന് പുതിയ മാര്ഗം കണ്ടെത്തിയിരിക്കുന്നത്. കിളിക്കൂടുകളും, കോഴി, താറാവ്, ആട് എന്നിവയുടെ കൂടുകളുമാണ് രാത്രിയില് വലിയ മരങ്ങളുടെ കൊമ്പില് കെട്ടിത്തൂക്കിയിട്ടിരിക്കുന്നത്. പകല് സമയം താഴെയിറക്കി ഇവയെ പുറത്ത് തുറന്നുവിടും. മേഖലയില് പുലി, കുറുക്കന്, മരപ്പട്ടി, കാട്ടുപന്നി എന്നിവയുടെ ശല്യം രൂക്ഷമാണ്. ഇതോടെയാണ് വളര്ത്ത് മൃഗങ്ങളുടെ കൂട് മരച്ചില്ലകളില് കെട്ടിത്തൂക്കാന് ആരംഭിച്ചത്. അതിര്ത്തി ഗ്രാമങ്ങളില് വന്യമൃഗശല്യം പ്രതിരോധിക്കാന് യാതൊരു സംവിധാനങ്ങളും നിലവിലില്ല.
