കോന്നി : കോന്നി പഞ്ചായത്തിലെ ആറാം വാര്ഡായ ആവോലിക്കുഴിയില് സ്വകാര്യ വ്യക്തിയുടെ പുരയിടത്തില് കാട്ടാന ചരിഞ്ഞു. ഞള്ളൂര് ഉത്തരകുമരംപേരൂര് ഫോറസ്റ്റേഷന് പരിധിയിലാണ് സംഭവം നടന്നത്. പത്ത് വയസോളം പ്രായം വരുന്ന കൊമ്പനാനയാണ് ചരിഞ്ഞത്. ആവോലിക്കുഴി സ്വദേശിയുടെ ഭൂമി കൃഷി ചെയ്യുവാന് മറ്റൊരാള്ക്ക് പാട്ടത്തിന് നല്കിയിരിക്കുകയായിരുന്നു. കൃഷി സംരക്ഷിക്കാനായി സ്ഥാപിച്ച വൈദ്യുത വേലിയില് നിന്നും ഷോക്കേറ്റതാണ് മരണ കാരണം എന്ന് ആദ്യ ഘട്ട പരിശോധനയില് കണ്ടെത്തിയിട്ടുണ്ട്. ജനവാസ മേഖലയിലാണ് ജഡം കണ്ടെത്തിയത്. സംഭവത്തില് വസ്തു ഉടമയ്ക്ക് എതിരെ കേസ് രെജിസ്റ്റര് ചെയ്യുമെന്നും പ്രതിയെ തിരിച്ചറിഞ്ഞിട്ടുണ്ടെന്നും കോന്നി ഫോറസ്റ്റ് റയ്ഞ്ച് ഓഫീസര് ശശീന്ദ്രന് പറഞ്ഞു.
കോന്നി ആര്.ഓ ശശീന്ദ്രന്, ഞള്ളൂര് ഡെപ്യൂട്ടി റെയ്ഞ്ച് ഓഫീസര് നൗഷാദ് എന്നിവരുടെ നേതൃത്വത്തിലുള്ള വനപാലക സംഘം സ്ഥലത്തെത്തി നടപടികള് സ്വീകരിച്ചു. കഴിഞ്ഞ കുറച്ച് കാലങ്ങളായി ആവോലിക്കുഴി,ഞള്ളൂര്, അതുംബുംകുളം ഭാഗങ്ങളില് സ്ഥിരമായി കാണപ്പെടുന്ന കാട്ടാനയാണ് ആവോലിക്കുഴിയില് ചരിഞ്ഞത് എന്നാണ് വനം വകുപ്പ് അധികൃതര് പറയുന്നത്. ജനവാസ മേഖലയില് പതിവായി എത്തുന്ന ആന വനപാലകരുടെ നിരീക്ഷണത്തില് കഴിഞ്ഞു വരികയായിരുന്നു. കഴിഞ്ഞ ഏറെ കാലമായി ഞള്ളൂരിലെ ജനവാസ മേഖലയില് കാട്ടാന ശല്യം രൂക്ഷമായി തുടരുകയാണ്. വനാതിര്ത്തികളില് സോളാര് വേലികള് പ്രവര്ത്തിക്കാത്തതാണ് കാട്ടാന ശല്ല്യം രൂക്ഷമാകാന് കാരണമെന്ന് പ്രദേശവാസികള് പറയുന്നു. നിരവധി കാര്ഷീക വിളകളും പ്രദേശത്ത് ഇതിനോടകം കാട്ടാന നശിപ്പിച്ചിട്ടുണ്ട്.
