പുനലൂര്‍ : കൊല്ലം ആര്യങ്കാവ് പഞ്ചായത്തിലെ ജനവാസ കേന്ദ്രങ്ങളില്‍ കാട്ടാനക്കൂട്ടം ഇറങ്ങി. പ്രദേശത്തെ വ്യാപകമായി കൃഷി നശിപ്പിച്ചു. സ്വകാര്യ എസ്റ്റേറ്റ് മേഖലയിലെ ആനച്ചാടി, രാജചോല, വെഞ്ച്വര്‍, ഇരുളന്‍കാട് തുടങ്ങിയ സ്ഥലങ്ങളിലാണ് ഭീതി പരത്തി കാട്ടാനക്കൂട്ടം ഇറങ്ങിയത്. ഗ്രാമവാസികളായ അശോകന്‍, രാജു, സോമന്‍ തുടങ്ങിയ കര്‍ഷകരുടെ പുരയിടത്തിലെ കാര്‍ഷിക വിളകളാണ് കാട്ടാനകൂട്ടം നശിപ്പിച്ചത്.
എസ്റ്റേറ്റ് മേഖലയില്‍ ഇറങ്ങിയ കാട്ടാനകള്‍ വനത്തിലേക്ക് മടങ്ങാത്തത് ജനങ്ങളെ ഭീതിയിലാഴ്ത്തിയിരിക്കുകയാണ്. വനപാലകരെ വിവരം അറിയിച്ചെങ്കിലും കാട്ടാനയെ വിരട്ടി വനത്തില്‍ കയറ്റിവിടാന്‍ അവര്‍ തയ്യാറായില്ല. കാട്ടനയെ ഭയപ്പെടുത്തിയാല്‍ അവ അക്രമാസക്തമാകുമെന്ന ആശങ്കയും വനപാലകര്‍ക്കുണ്ട്. ഇത് കാരണം എസ്റ്റേറ്റിലെ തൊഴിലാളികള്‍ ഭയന്ന് പുറത്ത് ഇറങ്ങാനും രാത്രിയില്‍ വാഹനങ്ങളില്‍ യാത്ര ചെയ്യാനും ഭയപ്പെടുകയാണ്.
