അന്തിക്കാട് : കുട്ടികളെ ഉപേക്ഷിച്ചു പോയ യുവതിയെയും സുഹൃത്തായ ഗുണ്ടാ നേതാവിനെയും അന്തിക്കാട് പോലീസ് അറസ്റ്റു ചെയ്തു. സാമൂഹികമാധ്യമത്തിലൂടെ പരിചയപ്പെട്ട യുവാവുമൊത്ത് സ്വർണവും പണവുമായാണ് പ്രവാസിയുടെ ഭാര്യയായ യുവതി കടന്നത്. ഒട്ടേറെ കേസുകളിൽ പ്രതിയായ ആലപ്പുഴ മായിത്തറ അരുണും (ഡോൺ അരുൺ -33) പഴുവിൽ സ്വദേശിനിയായ യുവതിയുമാണ് അറസ്റ്റിലായത്.
അരുണിനെതിരെ പാലക്കാട് ,ആലപ്പുഴ, ചേർത്തല, മുഹമ്മ മലപ്പുറം എന്നിവിടങ്ങളിൽ കേസുകളുണ്ട്. ഭർത്താവിൽ നിന്ന് മൂന്ന് ലക്ഷം രൂപയും ലോക്കറിൽ സൂക്ഷിച്ചിരുന്ന 40 പവനോളം സ്വർണവും ഇരുവരും ചേർന്ന് കൈക്കലാക്കിയിരുന്നു. അന്തിക്കാട് എസ്.ഐ. കെ.എച്ച്. റെനീഷിന്റെ നേതൃത്വത്തിൽ എ.എസ്.ഐ. എം.കെ. അസീസ്, സി.പി.ഒ.മാരായ അജിത്, ഷാനവാസ്, എസ്.സി.പി.ഒ. രാജി എന്നിവർ ചേർന്നാണ് പ്രതികളെ അറസ്റ്റ് ചെയ്തത്.
