ന്യൂഡല്ഹി: നിര്ബന്ധിത മതപരിവര്ത്തനം ആരോപിച്ചുള്ള മദ്ധ്യപ്രദേശിലെ വീട്ടമ്മയുടെ വീഡിയോ വൈറലായതിന് പിന്നാലെ പോലീസിനോട് ശക്തമായ നടപടിയെടുക്കാന് ആവശ്യപ്പെട്ട് ദേശീയ വനിതാ കമ്മീഷന് അദ്ധ്യക്ഷ രേഖ ശര്മ. തന്നെയും ഭര്ത്താവിനെയും നിര്ബന്ധിച്ച് ക്രിസ്തുമതത്തിലേക്ക് പരിവര്ത്തനം ചെയ്തതായി ആരോപിച്ച് ഒരു യുവതിയാണ് കഴിഞ്ഞ ദിവസം സമൂഹമാദ്ധ്യമങ്ങളിലൂടെ രംഗത്തെത്തിയത്. ബിഷപ്പും സംഘത്തിനുമെതിരെയാണ് യുവതിയുടെ ആരോപണം.
തങ്ങളെ ഒരു സംഘം ആളുകള് ചേര്ന്ന് വാട്ടര് ടാങ്കില് മുക്കിയെന്നും പ്രാര്ത്ഥനാ വചനങ്ങള് ചൊല്ലി മുങ്ങി കുളിക്കാനും ആവശ്യപ്പെട്ടെന്ന് യുവതി പറയുന്നു. ഇതിന് ശേഷം മാമോദീസ മുങ്ങി ക്രിസ്ത്യാനികളായതായി അവര് പ്രഖ്യാപിച്ചു. പള്ളിയില് പോകുന്നത് നിര്ത്തിയതോടെ ബിഷപ്പും സംഘവും ഭീഷണിപ്പെടുത്തിയതായി യുവതി ആരോപിക്കുന്നു. സഹായമായി തന്ന പണത്തിന്റെ നാലിരട്ടി ശല്യം അവസാനിപ്പിക്കാന് തരണമെന്നും ബിഷപ്പും സംഘവും ആവശ്യപ്പെട്ടതായി യുവതി ആരോപിച്ചു. പോലീസിനെ വിവരം അറിയിച്ചെങ്കിലും നടപടിയെടുത്തില്ലെന്ന് യുവതി പറയുന്നു. ഇതിന് പിന്നാലെയാണ് ഇവര് സമൂഹമാദ്ധ്യമങ്ങളിലൂടെ രംഗത്തെത്തിയത്.