കോഴിക്കോട് : പോലീസുകാര്ക്ക് ലിംഗനീതി സംബന്ധിച്ച പരിശീലനം കൊടുക്കണമെന്ന് വനിത കമീഷന് നിര്ദേശിച്ചിട്ടുണ്ടെന്ന് കമീഷന് അധ്യക്ഷ പി.സതീദേവി. ആലുവ പോലീസ് സ്റ്റേഷനില് സി.ഐ യുടെ മോശം പെരുമാറ്റത്തെ തുടര്ന്ന് മൂഫിയ പര്വീണ എന്ന നിയമ വിദ്യാര്ഥിനി ആത്മഹത്യ ചെയ്ത പശ്ചാത്തലത്തിലാണ് വനിത കമീഷന് അധ്യക്ഷയുടെ പ്രതികരണം.
സ്ത്രീവിരുദ്ധമായ സമീപനം പോതുസമൂഹത്തില് നിലനില്ക്കുന്ന അന്തരീക്ഷത്തിലാണ് നാം ജീവിക്കുന്നത്. ഇത് പോലീസ് സംവിധാനത്തേയും ബാധിക്കുന്നു. ആരോപണവിധേയനായ സി.ഐ ക്കെതിരെ നിരവധി പരാതികള് ഉയര്ന്നുവന്നിട്ടുണ്ട്. നിലവില് മൊഫിയയുടെ മരണത്തില് വനിതാ കമ്മീഷന് കേസെടുത്തിട്ടില്ല. പരിശോധിച്ചുവരികയാണെന്നും സതീദേവി പറഞ്ഞു. കേരളത്തിലെ എല്ലാ പോലീസ് സ്റ്റേഷനുകളിലേക്കും ഭീതിയില്ലാതെ കയറിച്ചെല്ലാനാകണം. എല്ലാ സ്റ്റേഷനുകളും ജനമൈത്രി പോലീസ് സ്റ്റഷേനുകളാക്കി മാറ്റാനുള്ള നടപടി സ്വീകരിക്കണമെന്ന് മുഖ്യമന്ത്രിയോട് ആവശ്യപ്പെട്ടിട്ടുണ്ടെന്നും സതീദേവി പറഞ്ഞു.
