മലപ്പുറം : യുവതിയെ ബൈക്കില് പിന്തുടര്ന്ന് ദേഹോപദ്രവം ഏല്പ്പിക്കാന് ശ്രമിച്ച യുവാവിനെ നാട്ടുകാരുടെ സഹായത്തോടെ പോലീസ് പിടികൂടി. കാരാട് പാലാമഠം സ്വദേശി പൂങ്ങോട്ട് പ്രജീഷ് എന്ന 34- കാരനെയാണ് നിലമ്പൂര് പോലീസ് അറസ്റ്റ് ചെയ്തത്. ഇന്നലെ രാവിലെ 10.30 ഓടെ നിലമ്പൂര് റെയില്വേ സ്റ്റേഷന് പരിസരത്ത് വെച്ചാണ് സംഭവം.
ബസ് ഇറങ്ങി നടന്നു പോകുകയായിരുന്ന യുവതിയെ ബൈക്കില് പിന്തുടര്ന്ന യുവാവ് വിജനമായ സ്ഥലത്തുവെച്ച് കയറിപ്പിടിക്കാന് ശ്രമിക്കുകയും തുടര്ന്ന് രക്ഷപ്പെടാന് ശ്രമിച്ച പ്രതിയെ അതുവഴി ബൈക്കിലെത്തിയ പ്രദേശ വാസികള് തടഞ്ഞുവെച്ച് പോലീസില് അറിയിക്കുകയുമായിരുന്നു. യുവതിയുടെ മൊഴിയുടെ അടിസ്ഥാനത്തില് കേസ് രജിസ്റ്റര് ചെയ്ത പോലീസ് പ്രതിയെ അറസ്റ്റ് ചെയ്ത് കോടതിയില് ഹാജരാക്കി. ഇന്സ്പെക്ടര് പി വിഷ്ണു, എസ് ഐ നവീന് ഷാജ് എന്നിവരുടെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്.
