കയ്പമംഗലം : നിരവധി ക്രിമിനല് കേസുകളില് പ്രതിയായ യുവാവിനെ കാപ്പ നിയമ പ്രകാരം അറസ്റ്റ് ചെയ്തു. എടത്തിരുത്തി പുളിഞ്ചോട് സ്വദേശി ചുണ്ടയില് ധനേഷിനെയാണ് (37) കാപ്പ ചുമത്തി കയ്പമംഗലം പോലീസ് അറസ്റ്റ് ചെയ്തത്. കയ്പമംഗലം, മതിലകം, വലപ്പാട്, കാട്ടൂര്, ഇരിങ്ങാലക്കുട, ചേര്പ്പ്, വയനാട് തുടങ്ങി സ്റ്റേഷനുകളിലായി വധശ്രമം, കവര്ച്ച, അക്രമം, ലഹരിമരുന്ന് വില്പന ഉള്പ്പെടെ മുപ്പതോളം കേസുകളില് പ്രതിയാണ് ഇയാള്.
വലപ്പാട് സ്റ്റേഷന് പരിധിയില് വധശ്രമ കേസില് ഉള്പ്പെട്ട് വിയ്യൂര് അതി സുരക്ഷ ജയിലില് കഴിയുന്ന ധനേഷിനെ ജില്ല പോലീസ് മേധാവി ഐശ്വര്യ ഡോങ്ങ്ഗ്രേയുടെ നിര്ദേശ പ്രകാരം കൊടുങ്ങല്ലൂര് ഡിവൈ.എസ്.പി സലീഷ് എന്. ശങ്കരന്റെ നേതൃത്വത്തില് കയ്പമംഗലം എസ്.ഐ കെ.എസ്. സുബീഷ് മോനും സംഘവും ജയിലിലെത്തിയാണ് അറസ്റ്റ് രേഖപ്പെടുത്തിയത്. സീനിയര് സി.പി.ഒ മുഹമ്മദ് റാഫി, സി.പി.ഒ രതീന്ദ്രന് എന്നിവരും അന്വേഷണ സംഘത്തിലുണ്ടായിരുന്നു.
