ചങ്ങരംകുളം : എം.ഡി.എം.എയും ബ്രൗണ് ഷുഗറുമായി പ്രധാന ഏജന്റ് പിടിയില്. പാലക്കാട് കടമ്പഴിപ്പുറം സ്വദേശി അര്ഷാദിനെയാണ് (31) ചങ്ങരംകുളം പോലീസ് പിടികൂടിയത്. 66 ഗ്രാം എം.ഡി.എം.എയും 11 ഗ്രാം ബ്രൗണ് ഷുഗറും 16 ഗ്രാം കഞ്ചാവും പ്രതിയില് നിന്ന് കണ്ടെത്തി. ചങ്ങരംകുളം എടപ്പാള് മേഖലയില് ബ്രൗണ് ഷുഗര് അടക്കമുള്ള വീര്യം കൂടിയ ലഹരിവസ്തുക്കള് വ്യാപകമായി വിറ്റഴിക്കുന്നുണ്ടെന്ന രഹസ്യ വിവരങ്ങളുടെ അടിസ്ഥാനത്തില് ചങ്ങരംകുളം സി.ഐ ബഷീര് ചിറക്കലിന്റെ നേതൃത്വത്തിലുള്ള പ്രത്യേക അന്വേഷണ സംഘം നടത്തിയ പരിശോധനയിലാണ് മുഖ്യപ്രതി പിടിയിലായത്.
അടിവസ്ത്രത്തിനുള്ളില് കവറിലാക്കി ഒളിപ്പിച്ച നിലയിലായിരുന്നു മയക്കുമരുന്ന്. ബംഗളൂരുവില് നിന്നാണ് വീര്യം കൂടിയ ലഹരി വസ്തുക്കള് പ്രദേശത്ത് വില്പനക്ക് എത്തിച്ചതെന്നാണ് സൂചന. സി.ഐ ബഷീര് ചിറക്കലിന്റെ നിര്ദേശപ്രകാരം എസ്.ഐ മാരായ പി. ആന്റോ ഫ്രാന്സിസ്, ഒ.പി വിജയകുമാരന്, സീനിയര് പോലീസ് ഓഫിസര് ഷിജു, സി.പി.ഒ മാരായ ഉദയന്, ജെറോ, ജസ്റ്റിന് രാജ്, രാജേഷ്, ഉണ്ണി, ഡ്രൈവര് ഭാഗ്യരാജ് തുടങ്ങിയവരാണ് പ്രതിയെ പിടികൂടിയത്. വൈദ്യപരിശോധനക്ക് ശേഷം പെരിന്തല്മണ്ണ ജുഡീഷ്യല് മജിസ്ട്രേറ്റ് കോടതിയില് ഹാജരാക്കും.
