ഡൽഹി : ബിസിനസ് പങ്കാളിയായ യുവതിയെ കൊലപ്പെടുത്തി യുവാവ് ജീവനൊടുക്കി. ഡൽഹിയിലാണ് സംഭവം. ഫെബ്രുവരി 23 മുതൽ കാണാതായ 32കാരിയാണ് കൊല്ലപ്പെട്ടത്. സംഭവത്തിന് ശേഷം പ്രതി ഹരിയാനയിലെ സോനിപത്തിൽ ജീവനൊടുക്കിയെന്ന് പോലീസ് കണ്ടെത്തിയിട്ടുണ്ട്. ബിസിനസ് പങ്കാളിയായ സോഹൻ ലാലിനൊപ്പം ആരംഭിക്കാനിരുന്ന നരേല പ്ലേസ്കൂളിൽ ബുധനാഴ്ചയാണ് യുവതിയുടെ മൃതദേഹം കണ്ടെത്തിയത്. ഫെബ്രുവരി 23 ന് ഇരുചക്രവാഹനത്തിൽ വീട്ടിൽ നിന്ന് പോയ മകൾ തിരിച്ചെത്തിയില്ലെന്ന് ഫെബ്രുവരി 24ന് സ്വതന്ത്ര നഗർ സ്വദേശി വിജയ് കുമാർ നരേല പോലീസ് സ്റ്റേഷനിൽ പരാതി നൽകിയിരുന്നു.
വിവാഹമോചിതയായ യുവതി പിതാവിനൊപ്പമാണ് താമസിച്ചിരുന്നത്. ബിസിനസ് പങ്കാളിയായ സോഹൻ ലാലിനൊപ്പമാണ് മകളെ അവസാനമായി കണ്ടതെന്ന് വിജയ് കുമാർ പോലീസിൽ നൽകിയ പരാതിയിൽ പറയുന്നു.
