അടൂര്: ഇന്സ്റ്റഗ്രാം വഴി പരിചയപ്പെട്ട പ്രായപൂര്ത്തിയാകാത്ത പെണ്കുട്ടിയെ വീട്ടില് അതിക്രമിച്ചു കയറി ലൈംഗിക അതിക്രമം കാട്ടിയ യുവാവ് അറസ്റ്റില്. കൊല്ലം പോരുവഴി ഇടക്കാട് ഒറ്റപ്ലാവിള തെക്കേതില് വീട്ടില് വി. അഖിലിനെ (23)യാണ് ഏനാത്ത് പോലീസ് അറസ്റ്റ് ചെയ്തത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
ഇയാള് ആറു മാസം മുമ്പാണ് പതിനേഴുകാരിയുമായി സാമൂഹിക മാധ്യമത്തിലൂടെ പരിചയപ്പെട്ടത്. ഇന്സ്റ്റാഗ്രാമിലും ഫോണ് മുഖേനയും പെണ്കുട്ടിയുമായി നിരന്തരം ബന്ധപ്പെട്ട് സൗഹൃദം സ്ഥാപിച്ച ശേഷം നേരില് കാണണമെന്ന് ആവശ്യപ്പെട്ടു. നിരസിച്ചപ്പോള് ഒപ്പം ചെന്നില്ലെങ്കില് വീട്ടില് കയറി എല്ലാവരെയും കൊല്ലുമെന്ന് ഭീഷണിപ്പെടുത്തി. മേയ് മാസത്തില് ഒരുദിവസം വീട്ടില് അതിക്രമിച്ചകയറിയ പ്രതി കുട്ടിയെ ഭീഷണിപ്പെടുത്തി കിടപ്പു മുറിയില് പിടിച്ചുവലിച്ചു കൊണ്ടുപോയ ശേഷം ഒരുമിച്ചുള്ള ഫോട്ടോകള് പെണ്കുട്ടിയുടെ ഫോണില് അനുജത്തിയെക്കൊണ്ട് എടുപ്പിച്ചു. ലൈംഗിക അതിക്രമം കാട്ടിയപ്പോള് തടഞ്ഞ് ബഹളം കൂട്ടിയ പെണ്കുട്ടിയെ ഫോട്ടോകള് പ്രചരിപ്പിച്ച് നാണം കെടുത്തുമെന്ന് ഭീഷണിപ്പെടുത്തുകയും ചെയ്തു.
പിന്നീട് ഇയാള് പെണ്കുട്ടി പോകുന്നയിടങ്ങളിലെല്ലാമെത്തി ശല്യപ്പെടുത്താന് തുടങ്ങി. കഴിഞ്ഞ 11 ന് രാവിലെ 8.15 ന് കുട്ടി പഠിക്കുന്ന സ്കൂളിന്റെ സമീപം എത്തിയ പ്രതി ബൈക്കില് കയറാന് ആവശ്യപ്പെട്ടു. വിസമ്മതിച്ചപ്പോള് മുഖത്തടിക്കുകയും ബലാല്ക്കാരമായി പിടിച്ചുകയറ്റുകയും ചെയ്തു. വിജനമായ സ്ഥലത്തെത്തിച്ച ശേഷം ലൈംഗിക അതിക്രമം നടത്തുകയും പുറത്തു പറഞ്ഞാല് വീട്ടില് കയറി എല്ലാരേയും കൊല്ലുമെന്ന് ഭീഷണിപ്പെടുത്തുകയും ചെയ്തു.
മാതാവിന്റെ മൊഴിപ്രകാരം പോക്സോ വകുപ്പുകള് കൂടി ചേര്ത്ത് കേസ് രജിസ്റ്റര് ചെയ്ത ഏനാത്ത് പോലീസ് ജില്ലാ പോലീസ് മേധാവിയുടെ നിര്ദേശാനുസരണം പ്രതിക്കായുള്ള അന്വേഷണം വ്യാപിപ്പിച്ചു. പെണ്കുട്ടിയുടെ മൊഴി രേഖപ്പെടുത്തുകയും അടൂര് ജനറല് ആശുപത്രിയില് വൈദ്യപരിശോധനയ്ക്ക് വിധേയയാക്കുകയും ചെയ്തു. ഇന്സ്പെക്ടര് പി.എസ്. സുജിത്ത്, എ എസ് ഐ രാധാകൃഷ്ണന്, എസ് സി പി ഓ മുജീബ്, സി പി ഓ ആതിര കൃഷ്ണന് എന്നിവരടങ്ങിയ സംഘമാണ് പ്രതിയെ പിടികൂടിയത്.
