അഞ്ചല് : വെല്ഡിങ് മെഷീന് തിരികെ നല്കാത്തതിന്റെ പേരില് സുഹൃത്തിന്റെ വീട്ടില്ക്കയറി ബഹളമുണ്ടാക്കുകയും ആക്രമിച്ച് പരിക്കേല്പ്പിക്കുകയും ചെയ്ത സംഭവത്തില് മൂന്ന് യുവാക്കളെ ഏരൂര് പോലീസ് അറസ്റ്റ് ചെയ്തു. വിളക്കുപാറ സ്വദേശികളായ സജി വിലാസത്തില് സതീഷ് (28) പ്രശാന്ത് ഭവനില് പ്രദീപ് (30) ഉഷസില് സുധീഷ് (32) എന്നിവരാണ് അറസ്റ്റിലായത്. വിളക്കുപാറ രഞ്ജിത് ഭവനില് രതീഷ് (31) നാണ് സുഹൃത്തുക്കളുടെ ആക്രമണത്തില് പരിക്കേറ്റത്.
ഒരു മാസം മുമ്പാണ് കേസിനാസ്പദമായ സംഭവം. വെല്ഡിങ് തൊഴിലാളികളും സുഹൃത്തുക്കളുമാണ് നാലു പേരും. സുധീഷിന്റെ പക്കല് നിന്നു രതീഷ് വെല്ഡിങ് മെഷീന് വാങ്ങിക്കൊണ്ടുപോയിരുന്നു. ദിവസങ്ങള് കഴിഞ്ഞിട്ടും തിരികെ ലഭിക്കാത്തതിനെ തുടര്ന്ന് സുധീഷുമായി രതീഷ് വാക്കേറ്റമുണ്ടായി. പിന്നാലെ രതീഷിനെ വീട്ടില് കയറി ആക്രമിച്ച് പരിക്കേല്പ്പിക്കുകയായിരുന്നു.
തലക്കും വലത് കൈവിരലുകള്ക്കും പരിക്കേറ്റ രതീഷിനെ ബന്ധുകള് ആശുപത്രിയില് പ്രവേശിപ്പിച്ചു. പോലീസ് കേസെടുത്തതിനെത്തുടര്ന്ന് ഒളിവിലായിരുന്ന മൂവരേയും കഴിഞ്ഞ ദിവസമാണ് വിളക്കുപാറയില് നിന്നു ഏരൂര് പോലീസ് അറസ്റ്റ് ചെയ്തത്. പുനലൂര് കോടതിയില് ഹാജരാക്കിയ പ്രതികളെ റിമാന്ഡ് ചെയ്തു.
